प्रेमको बकपत्र।
बिर्खे अञ्जान

 तिम्रो बिचारको बीर्यमा
स्खलन भएको छ -- प्रेमको भ्रुण
र , बिश्वास बिरूद्ध अस्तित्वको फैसला हुनु पूर्व
बलात्कृत भएछ -- नैतिकताको कौमार्य ।

न्यायाधीश बस्छन् या जल्लाद
थाहा छैन अदालतमा
अन्तर्मूल्याङ्कनको पूरातन पद्धति 
हो हिजो जस्तै आज पनि कायमै छ।

निषेधित अत्यासहरूको तूफान
प्रायः प्रेम माथि नै हमला गर्छ
र , संस्कार नामको पूरातन अहम् 
उध्रेका बिचारहरूको हुण्डरी बोकेर 
प्रेमको बस्ती उजाड बनाउँछ।

खोला बग्छ निरन्तर 
किनार चाहेर पनि हिड्न सक्दैन 
हो जूनलाई घामसँग जिस्कन मन छ
र , पनि रात बाहेक अरू उसको हुनै सक्दैन 
जति जोडे पनि कहिल्यै मिल्दैन 
अचम्मको छ प्रेमको गणित ।

माया फुल्ने फूलबारी 
माटो हुनै सक्दैन 
छातिभरि रोपेर स्पर्शको बिरुवा
उमार्न खोजेपनि मुटुमा प्रेमको गुँरास
अझेपनि असफल छन् --- मुनामदनको जोडी
अचेल अोठहरूले ममता होइन आक्रोश अोकल्छ
मानव सभ्यतामा हुर्किरहेछ -- घमण्डको बीउ
साच्चिकै कहाँ पाइन्छ  यतिखेर 
बिदूर जस्तै बिश्वासको हिमाल ।

च्यातेर फ्याकेको प्रेम पत्र
साक्षी राखेर भगवानलाई खाएका मायाको कसम
फेल भएको शैक्षिक प्रमाणपत्र 
अथवा बासी भएको अखबारका पानाहरू
हो सबै सबै आदिम भएका छन् इतिहासहरूमा।

बिचारको उत्तेजना 
भो ! नबर्साउ समयको कालो कठघरामा 
घाम अझै मलिनो छ
आगो तात्न सकेको छैन अघेनूमा
खिया लागेको भुत्ते मष्तिक
आरनमा नअर्जावेसम्म सँस्कृतिको हतियार 
फूलमाया !
 तिम्रो र मेरो प्रेम 
आकाश र धर्ती जस्तै हुन्छ।

तिम्रो बिचारको बीर्यमा
स्खलन भएको छ - प्रेमको भ्रुण
र बिश्वास बिरूद्ध अस्तित्वको फैसला हुनु पूर्व
बलात्कृत भएको छ -- नैतिकताको कौमार्य।

*******************

बिर्खे अञ्जान