१० पटक यात्रा गरे ११औँ पटक निःशुल्क ! पालुङदेखि काठमाडौंको जोरपाटीसम्म थाहानगर यातायात सञ्चालन हुँदै

मकवानपुर । थाहा नगरपालिकाका नागरिकलाई काठमाडौंसँग जोड्दै सुरक्षित, सहज र भरपर्दो यातायात सेवा उपलब्ध गराउने उद्देश्यले ‘थाहानगर यातायात’ सेवा सञ्चालनमा आउने भएको छ। पालुङदेखि काठमाडौंको जोरपाटीसम्म नियमित यात्रु सेवा सञ्चालनको तयारी गरिएको हो।
थाहा नगरपालिका–४, थानाबजारमा चार्जिङ स्टेसन तथा काठमाडौंको कलंकीमा टिकट काउन्टर स्थापना गरी कम्पनीले सेवा सञ्चालनको तयारी अघि बढाएको जनाएको छ।
थाहानगर यातायातमार्फत पालुङबाट चित्लाङ, थानकोट, कलंकी हुँदै काठमाडौंको जोरपाटीसम्म यात्रु आवागमनको व्यवस्था गरिनेछ। बिहान ६ बजेदेखि बेलुका ६ बजेसम्म काठमाडौं र पालुङ दुवैतर्फबाट प्रत्येक दुई घण्टाको अन्तरालमा सवारी छुट्ने तालिका बनाइएको छ।
त्यसैगरी नगरभित्र पालुङ, अङ्गारे, फाँटबजार, घर्ती, शिखरकोट लगायतका क्षेत्रमा समेत सेवा उपलब्ध गराइनेछ। यात्रुको आवश्यकता र मागअनुसार नगरपालिकाका अन्य क्षेत्रमा पनि सेवा विस्तार गर्दै लगिने कम्पनीले जनाएको छ।
यस्तो छ विभिन्न गन्तव्यको भाडादर
कम्पनीले सार्वजनिक गरेको भाडादरअनुसार काठमाडौं र थाहा नगरका विभिन्न गन्तव्यबीचको भाडा निर्धारण गरिएको छ।
काठमाडौं–चित्लाङ : रु. २००
काठमाडौं–बिसिङ्खेल/नौखण्डे : रु. २५०
काठमाडौं–बज्रबाराही : रु. २५०
काठमाडौं–कुन्छाल भञ्ज्याङ : रु. ३००
काठमाडौं–पालुङ : रु. ३५०
काठमाडौं–डाँडाबास : रु. ४७५
त्यस्तै नगरभित्रका गन्तव्यमा चित्लाङदेखि बिसिङ्खेल/नौखण्डेसम्म रु. ५०, बज्रबाराहीसम्म रु. १००, कुन्छाल भञ्ज्याङसम्म रु. १५० र पालुङसम्म रु. २०० भाडा निर्धारण गरिएको छ।
पालुङदेखि बज्रबाराहीसम्म रु. १००, कुन्छाल भञ्ज्याङसम्म रु. ५०, नौखण्डे/बिसिङ्खेलसम्म रु. १५० र चित्लाङसम्म रु. २०० भाडा लाग्नेछ।
१० पटक यात्रापछि ११औँ यात्रा निःशुल्क
यात्रुलाई थप सुविधा दिन कम्पनीले विशेष छुट योजना पनि सार्वजनिक गरेको छ। कम्पनीका अनुसार १० पटक टिकट काटेर यात्रा गरेका यात्रुले ११औँ पटक निःशुल्क यात्रा गर्न पाउनेछन्। यसका लागि यात्रुले अघिल्ला यात्राका टिकट सुरक्षित राख्नुपर्नेछ।
यात्रुहरूको सुविधाका लागि पालुङको थानाबजार र काठमाडौंको कलंकीमा टिकट काउन्टरको व्यवस्था गरिएको छ। फोनमार्फत पनि टिकट बुकिङ तथा सेवासम्बन्धी जानकारी लिन सकिनेछ।
टिकट बुकिङ तथा सम्पर्क नम्बर:
काठमाडौं, कलंकी : ९७१५२०२०१५
पालुङ, थानाबजार : ९७१५३०३०१५
थाहानगर यातायात सेवा सञ्चालनमा आएपछि स्थानीय नागरिकको आवागमन सहज हुनुका साथै चित्लाङ, दामन, पालुङलगायत थाहा नगरका पर्यटकीय क्षेत्रको प्रवर्द्धनमा समेत टेवा पुग्ने अपेक्षा गरिएको छ। काठमाडौं र थाहा नगरबीचको यातायात सम्पर्कलाई थप व्यवस्थित र प्रभावकारी बनाउन यो सेवा उपयोगी हुने विश्वास गरिएको छ।