अंगारेका माधव कार्कीले इन्द्रायणी मन्दिरमा चढाए पित्तलको पाता

थाहा । मकवानपुरको थाहा नगरपालिका–२, अंगारेका युवा समाजसेवी माधव कार्कीले पालुङस्थित इन्द्रायणी मन्दिरमा पित्तलको पाता चढाएका छन्। धार्मिक तथा सांस्कृतिक सम्पदाको संरक्षण र मन्दिरको सौन्दर्य अभिवृद्धिमा योगदान पुर्‍याउने उद्देश्यले कार्कीले मन्दिरमा पित्तलको पाता चढाएका हुन्।
कार्कीले यसअघि पनि इन्द्रायणी मन्दिरमा हात्तीको मूर्ति चढाएर धार्मिक आस्थासँगै स्थानीय सम्पदाको संरक्षणमा योगदान पुर्‍याएका थिए। त्यस्तै, थाहा नगरपालिका–३ गोपाली गाउँमा अवस्थित श्री सेती गणेश मन्दिरमा पनि उनले पित्तलको पाता चढाएका थिए। थाहा नगरपालिका–२ पालुङमा रहेको पाण्डुकेश्वर महादेव मन्दिरमा समेत विभिन्न देवीदेवताका मूर्ति चढाएर उनले धार्मिक कार्यमा सहयोग गर्दै आएका छन्।
मन्दिरको संरक्षणमा व्यक्तिगत सहयोग महत्त्वपूर्ण
पालुङका युवा निरोज प्रधानले माधव कार्कीको सहयोगको खुलेर प्रशंसा गरेका छन्। प्रधानका अनुसार कार्कीजस्ता समाजसेवी तथा विभिन्न व्यक्तिहरूको निरन्तर सहयोगले स्थानीय मन्दिरहरूको संरक्षण, व्यवस्थापन र सौन्दर्य अभिवृद्धिमा महत्त्वपूर्ण टेवा पुगेको छ।
प्रधानले धार्मिक स्थलहरू केवल पूजाआजा गर्ने स्थान मात्र नभई स्थानीय कला, संस्कृति, परम्परा र सामुदायिक एकताको पहिचानसमेत भएको उल्लेख गर्दै यस्ता सम्पदाको संरक्षणमा सबैको साथ र सहयोग आवश्यक रहेको बताए।
उनका अनुसार मन्दिरको विकास र संरक्षणका लागि एक व्यक्तिको प्रयास मात्र पर्याप्त हुँदैन। समाजका विभिन्न व्यक्ति, दातृ मन र स्थानीय समुदायको सामूहिक सहभागिताले नै धार्मिक स्थललाई व्यवस्थित, आकर्षक र भावी पुस्ताका लागि सुरक्षित बनाउन सकिन्छ। कार्कीलगायत सहयोगीहरूको योगदानले मन्दिरको स्वरूप परिवर्तन गर्न तथा धार्मिक सम्पदाप्रति समुदायको अपनत्व बढाउन मद्दत पुगेको प्रधानको भनाइ छ।
स्थानीय धार्मिक तथा सांस्कृतिक सम्पदाको संरक्षणमा व्यक्तिगत पहलबाट सुरु भएका यस्ता सहयोगले समाजमा सकारात्मक सन्देश प्रवाह गर्नुका साथै अन्य व्यक्तिलाई पनि सामाजिक तथा धार्मिक कार्यमा योगदान दिन प्रेरित गर्ने अपेक्षा गरिएको छ।