दामनमा वनस्पति खेतीसम्बन्धी एकदिने अभिमुखीकरण कार्यक्रम सम्पन्न

दामन। मकवानपुरको थाहा नगरपालिका–दामनस्थित पर्वतीय वनस्पति उद्यानमा वनस्पति खेतीसम्बन्धी प्राविधिक सरसल्लाह तथा समन्वय विषयक एकदिने अभिमुखीकरण कार्यक्रम सम्पन्न भएको छ।
असोज २७ गते वनस्पति अनुसन्धान केन्द्र मकवानपुरका प्रमुख रघुराम पराजुलीको प्रमुख आतिथ्यतामा कार्यक्रम सम्पन्न भएको हो। कार्यक्रममा वनस्पति अनुसन्धान केन्द्र टिष्टुङका फिल्ड अफिसर अरुण चौधरी, दामन वनस्पति केन्द्रका फिल्ड अफिसर पुनम चौधरीलगायत स्थानीयवासीको उपस्थिति रहेको थियो।
कार्यक्रममा वनस्पति खेतीको सम्भावना, खेती गर्ने प्राविधिक विधि, उपयुक्त प्रजातिको छनोट तथा वनस्पति खेतीलाई व्यवस्थित र व्यावसायिक बनाउने विषयमा सरसल्लाह तथा समन्वय गरिएको थियो।
कार्यक्रमलाई सम्बोधन गर्दै वनस्पति अनुसन्धान केन्द्र मकवानपुरका प्रमुख रघुराम पराजुलीले वनस्पति खेतीलाई वातावरण संरक्षणसँगै स्थानीयको आयआर्जन र आर्थिक समृद्धिसँग जोड्नुपर्ने बताए। उनले वनस्पति खेती गर्दा उपयुक्त प्रजातिको छनोट, माटो र हावापानीको अनुकूलता, वैज्ञानिक खेती प्रविधि तथा नियमित हेरचाहमा ध्यान दिनुपर्नेमा जोड दिए।
उनले वनस्पति खेतीसम्बन्धी प्राविधिक ज्ञान र सीपको उपयोग गर्दै स्थानीयस्तरमा उपलब्ध सम्भावनालाई सदुपयोग गर्न सके यस क्षेत्रको वनस्पति विविधता संरक्षण तथा व्यावसायिक खेती प्रवर्द्धनमा सहयोग पुग्ने धारणा व्यक्त गरे।
अभिमुखीकरण कार्यक्रमले स्थानीयवासीलाई वनस्पति खेतीसम्बन्धी प्राविधिक जानकारी उपलब्ध गराउनुका साथै वनस्पति अनुसन्धान केन्द्र र स्थानीय समुदायबीच समन्वय तथा सहकार्य अभिवृद्धि गर्न सहयोग पुग्ने अपेक्षा गरिएको छ।