हेटौंडामा कोरा साइकल र्याली हुने

फाइल तस्विर

मकवानपुर, २ साउन/मकवानपुर जिल्लाको हेटौंडामा  कोरा साईकल र्‍याली हुनेभएकोछ । बिगत ७ बर्षदेखि साईकल महोत्सव गर्दै आईरहेको हेटौंडा राइडर्स क्लबले सातौं संस्करणको कोरा साईकल र्‍याली-२०२४ आयोजना गर्ने भएको हो ।
हेटौंडा राइडर्स क्लबको आयोजनामा हुने कोरा साईकल र्‍याली-२०२४  आउँदो शनिबार हुने आयोजकले जनाएको छ ।
बुधबार हेटौंडामा भएको पत्रकार सम्मेलनमा “यो प्रतियोगिता होइन, सबै विजेता हुन्” भन्ने नारासहित आयोजना हुने साइकल यात्राले शहरलाई साइकलमैत्री बनाउने र स्थानीय तीर्थस्थल एवं बस्तीहरूको पहिचान बढाउने लक्ष्य राखेको आयोजकले जनाएको छ ।
हेटौंडा राइडर्स क्लबका अध्यक्ष विकास ताम्राकारका अनुसार करिब ५० किलोमिटर लामो साईकल र्‍यालीमा चितवन, बारा, पर्सा र काठमाडौंबाट गरी २५० भन्दा बढी साईकल यात्रीहरूको सहभागिता हुने अपेक्षा गरिएको छ। 
साईकल र्‍यालीमा १२ वर्षमाथि सबै उमेर समूहका महिला र पुरुषहरूले भाग लिन सक्ने आयोजकले जनाएकाछन्।
र्‍याली हेटौंडा १० स्थित भुटनदेवी मन्दिरबाट सुरु भई हेटौंडाका विभिन्न स्थान सानोपोखरा, वनस्खण्डी, जलेश्वर महादेव मन्दिर, चौकिटोल, सामरी, शिखरकटेरी, सालकपार्क, राजदेवी, एक्लीखेत, हर्नामाडी, हटिया, चौघडा, पिप्ले, कान्तिराजपथ हुँदै बुद्ध चोकमा आई सम्पन्न हुनेछ। 
साईकल र्‍यालीमा सहभागिताको लागि २ सय रुपैयाँ रजिष्ट्रेसन शुल्क लाग्नेछ भने सहभागीहरूलाई नि:शुल्क जर्सी उपलब्ध गराइनेछ। 
आयोजकका अनुसार उक्त साईकल र्‍याली कार्यक्रमको लागि करिब ५ लाख रुपैयाँ खर्च हुने जनाईएको छ।
हालसम्म २ सय जनाले साईकल र्‍यालीमा सहभागी हुन नाम दर्ता गराइसकेको अध्यक्ष ताम्राकारले जानकारी दिए। 
यो साईकल र्‍यालीले स्वस्थ जीवनशैली प्रवर्द्धन गर्नुका साथै पर्यटन प्रवर्द्धनमा समेत योगदान पुर्‍याउने विश्वास गरिएको अध्यक्ष ताम्राकार बताउँछन् ।