स्वर्गीय केसीको स्मृतिमा दीप प्रज्वलन, छोरीको नाममा अक्षय कोष स्थापना गरिने

जेसीवी दूर्घटनामा परी निधन भएका थाहा–४ का पूर्णध्वज केसीको स्मृतिमा पालुङ जेसीज, शिखरकोट बजार व्यवस्थापन समिति र शिखर क्लबले संयुक्त रुपमा आइतबार साँझ शिखरकोटमा दीप प्रज्वलन गरेको छ । दिवंगत आत्माको चीर शान्तिको कामनासहित मौन धारणसमेत गरिएको छ ।

शिखरकोटको कृष्ण मन्दिरमा भएको उक्त दीप प्रज्वलन कार्यक्रममा थाहा नगरपालिका वडा नं ३ का वडा अध्यक्ष राजेश के.सी, नेकपा थाहानगरका अध्यक्ष अरूण रायमाझी, पालुङ जेसीज वर्ष २०२० का अध्यक्ष मनोज रायमाझी, फरक सोचका अध्यक्ष यादवजंग रायमाझी, थाहा होटल एसोसिएसन अध्यक्ष शिवकुमार खत्री लगायत आयोजक समितिका पदाधिकारीहरु उपस्थिति थिए ।

दीप प्रज्वलनका बीच केसीको छोरीको नाममा शैक्षिक अक्षय कोष स्थापना गर्ने र उक्त कोषको व्याजबाट माध्यमिक तहसम्म शिक्षामा सहयोग गर्ने घोषणा गरिएको छ । उक्त कोषलाई माध्यमिक शिक्षापछि केसीको छोरीकै निर्णय अनुसार हुनेगरी कोष स्थापना गर्न लागेको पालुङ जेसीजका अध्यक्ष मनोज रायमाझीले बताए ।
कोषको लागि रकम संकलन हुन थालिसकेको पनि अध्यक्ष रायमाझीले जानकारी दिए । 

पालुङ जेसीज वर्ष २०२० का जनसम्पर्क अधिकारी र शिखरकोट बजार व्यवस्थापन समितिका उपाध्यक्ष रहेका केसीको गत जेठ २२ गते चित्लाङ–थानकोट सडक खण्डको सेतो पहरा नजिकै जेसीबी दूर्घटना हुँदा उपचारको क्रममा निधन भएको थियो । उनी सानो उमेरदेखि नै विभिन्न सामाजिक क्रियाकलापमा सहभागी हुँदै आएका थिए ।

केसीको १३ औं दिनको पुण्य तिथीमा श्रद्धाञ्जली सभा गर्ने आयोजकले जानकारी दिएको छ । वि.सं. २०४४ साल असोज २ गते शिखरकोटमा जन्मिएका केसीको परिवारमा आमा, श्रीमती, एक छोरी र दुई छोरा छन् ।