सेवा क्षेत्रमा संक्रमित नभए प्रत्यक्ष पढाउनु : थाहा नगरपालिका

थाहा नगर शिक्षा समितिको बैठकले थाहानगरमा कोभिड–१९ को जोखिम बढेको भन्दै विद्यालयहरुलाई सेवा क्षेत्रमा कोरोना संक्रमित व्यक्ति भएसम्म प्रत्यक्ष पठनपाठन नगर्न आग्रह गरेको छ । सेवा क्षेत्रमा कोभिड–१९ संक्रमित व्यक्ति नभएको अवस्थामा विद्यालयमा नै विद्यार्थी बोलाएर पठनपाठन गर्न सकिने समितिले स्पष्ट पारेको छ । 

कुनै क्षेत्र विशेषमा नियमित विद्यालय संचालन हुन सक्ने अवस्था भएमा प्रत्यक्ष सिकाई क्रियाकलाप संचालन गर्न बाधा नपर्ने पनि शिक्षा समितिले जनाएको छ ।  

नगर शिक्षा अधिकारी शोभाकर रेग्मीद्वारा हस्ताक्षरित सुचनामा विद्यालयको सेवा क्षेत्रभित्र कोभिड–१९ को संक्रमित व्यक्ति भएसम्म विद्यार्थी सिकाई सहजीकरण निर्देशिकाको ३३.१ अनुसार गर्न गराउन निर्देशन गरिएको छ । 

निर्देशिकाको ३३.१ मा कोभिड–१९ संक्रामक रोग वा अन्य यस्तै प्रकृतिका विपदबाट सिर्जना हुने विषम परिस्थितिमा सिकाई प्रणालीलाई निरन्तरता दिने प्रयोजनका लागि दूर तथा खुला शिक्षा लगायतका पद्धतिलाई सिकाई सहजीकरण प्रणालीको रुपमा लागू गर्न सकिने उल्लेख छ  । 

सोहीबमोजिम समितिले रेडियो, टेलीभिजन र अनलाइन मध्ये उपयुक्त क्रियाकलापबाट थप प्रभावकारी तवरले विद्यार्थीहरुलाई सिकाउन स्मरण गराएको छ । सेवा क्षेत्रमा कोरोना संक्रमित व्यक्ति  रहेको अवस्थामा पनि शिक्षकहरु विद्यालयमा अनिवार्य उपस्थित हुन र दूर तथा खुला शिक्षामा सहभागी हुन थाहा नगर शिक्षा समितिले निर्देशन दिएको छ । दूर तथा खुला सिकाइमा संलग्न नभएको पाइएमा थाहा नगरपालिका कडा कारबाही गर्न बाध्य हुने शिक्षा समितिका अध्यक्ष एवम् थाहा नगरपालिकाका प्रमुख लवशेर विष्टले बताउनु भयो । 

यसैबीच थाहा नगर शिक्षा समितिसँगको सम्झौताअनुसार रेडियो शिक्षा कार्यक्रम प्रशारणको अवधि साउन मसान्तमै समाप्त भए पनि कोभिड–१९ को जोखिम कायमै रहेको र नगरमा सहजरुपमा विद्यालय संचालन हुन नसकिरहेकोले रेडियो शिक्षा कार्यक्रमलाई निरन्तरता दिइरहेको दामन एफ. एम. ले जनाएको छ । 

विहान सवा ९ बजे र अपरान्ह सवा ६ बजे नियमित रुपमा विद्यालय शिक्षा कार्यक्रम प्रशारण गरिरहेको दामन एफएमका अध्यक्ष अरुण रायमाझीले बताउनु भयो ।