सुशासन र उद्यम विकासको लागि सरकार र समुदायबिच छलफल

हेटौंडा, २८ फागुन
ग्रिन फाउण्डेशन नेपाल(जि एफ एन) ले हेटौंडामा वनमा आधारित उद्यम विकासको लागि हेटौंडामा सरकार र समुदायबिच छलफल तथा अन्तक्र्रिया कार्यक्रम गरेको छ । संस्थाले उद्यम विकास संगै सुशासन कायम गर्नुको साथै समुदाय र स्थानिय सरकारबिचको समन्वयात्क सम्बन्ध सुदृढ गर्दै समस्या समाधान गर्नको लागि कार्यक्रमको आयोजना गरेको हो ।
हेटौंडा उपमहानगरपालिका वन, वातावरण बिभाग समितिका प्रमुख एबम् १० नम्बर वडा अध्यक्ष फुर्वा लामाले समृद्ध समुदायको लागि स्थानिय उत्पादनलाई जोड दिन उपहमानगर तयार रहेको बताउनुभयो । उहाँले उद्यम विकासले स्वरोजगार सृजना गरेको बताउदै उपमहानगरपालिकाले स्थानिय उत्पादन प्रबद्र्धनमा काम गरिरहेको जनाउनुभयो । यसको साथै सामुदायिक वन उपभोक्ता महासंघ र ग्रिन फाउण्डेशन नेपालले वनमा आधारित उद्यमको जग बसाउनुको साथै यसको दिगो विकासको लागि भुमिका खेलेको समेत उल्लेख गर्नुभयो ।
 डिभिजन वन कार्यालय हेटौंडाका सहायक वन अधिकृत बसन्तराज गौतमले अबको आर्थिक उत्पादनको स्रोत भनेको उद्यम भएकोले वनमा आधारित उद्यम विकासले समुदायसंगै सिंगो राज्यको अर्थतन्त्रमा खास भुमिका खेल्ने बताउनुभयो । उहाँले नेपालमा अब आफ्नो नीजि वनमा लगाएका काडपातहरु अन्नबालि सरह ओसारपसार गर्न पाउने समेत काननुले बाटो खुलाइदिएको जानकारी दिनुभयो । 
यसैगरी कार्यक्रममा उद्यम, पर्यटन र सहकारी महाशाखा प्रमुख हिमशर्मा पौडेलले उद्यम गर्छु भनेर अठोट गर्ने समुहलाई उपमहानगरपालिकाले तालिम र बिउपुँजि समेत उपलब्ध गराउने प्रतिबद्धता ब्यक्त गर्नु भयो । उहाँले तालिम लिनको लागि मात्र तालिम लिने नभएर उद्यमी बन्नको लागि तालिम लिएमा उपमहानगरपालिकामा बजेटको समस्या नभएको बताउनुभयो ।
 कार्यक्रममा बोल्दै ग्रिन फाउन्डेन नेपालकी कोषाध्यक्ष आरती पाठकले संस्थाको उदेश्य नै कषि र वनमा आधारित उद्यम विकास गर्ने, उद्यमीहरुको दिगो ब्यबसथापनको लागि सरकार र समुदायबिच पुलको काम गर्ने, बजारिकरणको लागि तालिमहरु उपलब्ध गराउने र स्थानिय उत्पादनलाई बजार सम्म लैजान प्रोत्साहन गर्ने रहेको जानकारी दिनुभयो । यसको साथै सरकारको तर्फबाट उद्यमविकासको लागि बजेट बिनियोजनको लागि पहल गरिदिने समेत जनाउनुभयो ।
सामुदायिक वन उपभोक्ता महासंघ मकवानपुरका अध्यक्ष साधुराम चौलागाईको अध्यक्षतामा कार्यक्रम सम्पन्न भएको थियो ।