सहकारी सुदृढीकरणका लागि थाहामा क्षमता अभिवृद्धि तालिम सम्पन्न

थाहा, मकवानपुर । थाहा नगरपालिकाको सहकारी शाखाको आयोजनामा “सहकारीको संस्थागत विकास, सुशासन र कार्यक्षमता सुदृढीकरण सम्बन्धी सहकारी क्षमता अभिवृद्धि” विषयक एक दिवसीय तालिम सम्पन्न भएको छ।
तालिममा मकवानपुर जिल्ला सहकारी संघका व्यवस्थापक गोविन्द दाहाल ले सहकारी संस्थाको संस्थागत विकास, सुशासन, पारदर्शिता तथा कार्यक्षमता अभिवृद्धिका विषयमा अभिमुखीकरण गरेका थिए।
कार्यक्रमको उद्घाटन गर्दै थाहा नगरपालिकाका प्रमुख प्रशासकीय अधिकृत निरज पौडेल ले सहकारी संस्थाका सञ्चालक, कर्मचारी तथा शेयर सदस्यहरूको इमान्दार र जिम्मेवार प्रयासबाट मात्रै सहकारी क्षेत्र सुदृढ बन्न सक्ने बताए। उनले सहकारीले आर्थिक विकाससँगै समाजमा सकारात्मक परिवर्तन ल्याउन महत्वपूर्ण भूमिका निर्वाह गर्दै आएको उल्लेख गरे।
पौडेलले सहकारी संस्थाहरूलाई पारदर्शी, उत्तरदायी र सदस्यमुखी बनाउँदै लैजान आवश्यक रहेको बताउँदै सुशासनको अभ्यासले सहकारीप्रतिको विश्वास अझ मजबुत हुने धारणा व्यक्त गरे।
थाहा नगरपालिका सहकारी शाखा प्रमुख सुदर्शन पहेँली का अनुसार तालिममा नगरभित्र रहेका विभिन्न सहकारी संस्थाका सञ्चालक समिति, लेखा सुपरिवेक्षण समितिका पदाधिकारी तथा कर्मचारी गरी ६० जनाको सहभागिता रहेको थियो।
सहकारी संस्थाको क्षमता अभिवृद्धि, सुशासन प्रवर्द्धन तथा संस्थागत सुदृढीकरणमा सहयोग पुर्‍याउने उद्देश्यले आयोजना गरिएको उक्त तालिमले सहभागीहरूलाई सहकारी व्यवस्थापनका व्यवहारिक पक्षबारे थप ज्ञान र सीप प्रदान गरेको आयोजकले जनाएको छ।