सरकारले बाढीपहिरो पीडितलाई राहत दिने

कात्तिक ४/कात्तिकको पहिलो साता भएको बर्षाका कारण बाढी पहिरोबाट घर भत्केकाहरूको घर निर्माणका लागि नेपाल सरकारले ५ लाखसम्म आर्थिक सहयोग उपलब्ध गराउने निर्णय गरेको छ । 

बुधबार प्रधानमन्त्री शेर बहादुर देउबाको अध्यक्षतामा बसेको मन्त्रिपरिषद् बैठकले  तराईमा घर बनाउन ३ लाख, पहाडमा घर बनाउन ४ लाख र हिमाली भेगमा घर बनाउन ५ लाख उपलब्ध गराउने निर्णय गरेको गृहमन्त्री बालकृष्ण खाँणले जानकारी दिनुभयो । 

साथै गृहमन्त्री खाँणले घर निर्माणका लागि जग्गाको अभाव हुनेका लागि थप ३ लाख पनि उपलब्ध गराइने समेत निर्णय भएको बताउनुभयो । 

यस्तै विपद् व्यवस्थापन समितिको तर्फबाट घरबारविहीन भएकाहरुलाई तत्काल ५० लाख पनि उपलब्ध गराउने निर्णय भएको छ ।

तेस्तै सरकारले हालै गएको बाढी पहिरोका कारण मृत्यु भएकाका परिवारलाई कम्तीमा दुई लाख रुपैयाँ आर्थिक सहयोग दिने पनि निर्णय गरेको छ । 

मन्त्रिपरिषद्को बैठकले एक जनाको मृत्यु भएको परिवारलाई २ लाख र सोही परिवारका थप सदस्यको मृत्यु भएमा मृतक प्रति सदस्य थप एक लाख रुपैयाँका दरले अतिरिक्त रकम दिने निर्णय गरेको छ ।

सिंहदरबारमा बसेको  मन्त्रिपरिषद् बैठकले घाइतेहरुको निःशुल्क उपचार गर्ने निर्णय सहित राहत र उद्धारको कार्यलाई प्रभावकारी ढंगले अघि बढाउने निर्णय गरेको छ । बैठकले राहत र उद्धारको लागि राज्यका सबै संयन्त्र परिचालि हुन निर्देशन समेत दिएको छ ।