सबै धर्म र संस्कृतिको संरक्षणमा थाहा नगर कटिबद्ध छ:- नगर प्रमुख बिष्ट

थाहा नगरपालिका ४ माथिल्लो भेगमा  बसोवास गर्ने तामाङहरुले २८६९ मन्जुश्री संवत्(डुक ल्हो)गरुड बर्ष सोनाम ल्होछार  ठुलोमाखुमा मनाएका छन् ।

स्थानीय तामाङ समुदायको  आयोजनामा ल्होछारका अवसरमा २५ माघमा गरिएको चेलीबेटी भेटघाट तथा साँस्कृतिक कार्यक्रममा थाहा ४ को माथिल्लो भेगमा  बसोवास गर्ने तामाङहरु आफ्नो वेशभूषामा उपस्थित थिए ।

कार्यक्रममा सहभागि प्रमुख अतिथी थाहा नगरपालिकाका प्रमुख बिष्णु बहादुर बिष्टले सबै जातजातिको मौलिक अधिकार सुनिश्चित गर्न र संस्कृतिलाई जोगाई नयाँ उचाइमा पुर्याउन ल्होछारले ठूलो भूमिका खेल्ने बताउदै,सबै धर्म र संस्कृतिको जगेर्ना गर्न थाहा नगरपालिका सदैव तयार रहेको बताउनुभयो।
बिष्टले तामाङहरु विश्वको कुनै पनि स्थानमा बसोबास गरे पनि आफ्नो मौलिकतालाई जोगाइराख्न आआफ्नो ठाउँबाट पहल गरिनुपर्ने बताउदै ल्होछारको अवसरमा शुभकामना व्यक्त गर्नुभयो।
कार्यपालिका सदस्य तथा आयोजक समितिको संयोजक चन्द्रमाया थिङको सभापतित्वमा भएको ल्होछार कार्यक्रममा थाहा नगरपालिका प्रमुख बिष्णु बिष्टको प्रमुख आतित्थ्यता संगै वडा न ४ का अध्यक्ष नारायण लामा,वडा सदस्य हरु सुन्दर केसी,अक्षय कुमार थिङ,शान्ती बिश्वकर्मा,भुमी आयोग मकवानपुरका सदस्य अरुण रायमाझी,पालुङ क्याम्पसका क्याम्पस प्रमुख राजन मिश्र,कुण्डलदेवी बहुउद्देश्यीय सहकारीका अध्यक्ष शिवकुमार खत्री,पत्रकार शम्भु अधिकारी,नेपाल दलित मुक्ति मोर्चाका प्रदेश सचिव जमिन दियाली,माओवादी केन्द्र थाहा ४ का सदस्य मिना लामा,थाहा कोशेली घरका संयोजक राजकुमार पन्त लगायतका उपस्थिति रहेको थियो।
कार्यक्रममा तामाङ संस्कृति ,भेषभुषा,तामाङ खानाका परिकारका साथै सांस्कृतिक कार्यक्रम समेत प्रस्तुत गरिएको थियो।