सडक दुर्घटनामा परिवारका पाँच जनाको ज्यान गएपछि सेतो पहरामा महादेवको मन्दिर बनाउँदै गौतम परिवार

गत पुसमा एकै परि वार का पाँच जनाको ज्यान जाने गरी कार दुर्घटना भएको थानकोट-चन्द्रागिरि-चित्लाङ सडकको सेतो पहरा क्षेत्रमा महादेवको मन्दिर निर्माण गरिने भएको छ ।

काठमाडौं लाजिम्पाट निवासी शैलेन्द्रकुमार गौतमले पुनः यस्ता दुर्घटना कुनै पनि परिवारले बेहो र्नु नपरोस भन्दै सेतो पहरा क्षेत्रमा महादेव मन्दिर निर्माण गर्न लाग्नुभएको हो ।
शैलेन्द्रकुमार, इन्जिनियर सहितको टोलीले हिजो शनिबार महादेव मन्दिर निर्माण गर्न स्थान छनोटका लागि सेतो पहरा क्षेत्रको अवलोकन गरेको छ । 

मकवानपुरको चित्लाङ र काठमाडौंको थानकोट जोड्ने उक्त सडकको काठमाडौंतर्फ सेतो पहरामा गत पुस २८ गते कार दुर्घटनामा परी शैलेन्द्रकुमारका छोरा डा. महेशकुमार गौतमसहित पाँच जनाको मृत्यु भएको थियो । चित्लाङ घुम्नका लागि कारमा जाँदै गरेका ६ जनामध्ये डा. महेशकुमारकी श्रीमती डा. सृष्टि गौतम तिवारी मात्र बाँच्नुभएको थियो ।

दुर्घटनामा शैलेन्द्रकुमारका छोरा सहित नातिनी स्मायरा, नाति श्रीयांश, सम्धि ओमकारनिधि तिवारी र सम्धिनी कल्पना तिवारीको मृत्यु भएको थियो ।

छोरा, नातिनातिनासहित आफन्तको चिर शान्तिको कामनासँगै अन्य व्यक्तिले यस्तो अप्रिय घटना बेहो र्नु नपरोस् भनेर महादेव मूर्ति स्थापना गर्न लाग्नुभएको चित्लाङका रघुनाथ लामिछाने ले जानकारी दिनुभयो ।

आफन्तको स्मरणमा आफ्नो निजी खर्चमा महादेव मन्दिर निर्माणसँगै मन्दिर निर्माण क्षेत्रमा रुद्राक्षको बिरुवासमेत लगाउने आफ्नो योजना रहेको शैलेन्द्रकुमारले सुनाउनुभयो । चित्लाङ-थानकोट सडक आयोजनाले सडक केन्द्रबाट पाँच मिटर छाडेर मन्दिर निर्माण गर्न दिने गरी सहमति जनाएको छ, आजको गोरखापत्र दैनिकमा खबर छ ।