रुकुम पश्चिम हत्याकाण्डका मृतकहरूको स्मृतिमा हेटौंडामा खबरदारी सभा

जातीय भेदभाव र छुवाछुतको कारण रुकुम पश्चिममा भएको दुर्भाग्यपूर्ण हत्याकाण्डको चार वर्षपछि पनि त्यसको स्मरण गरिएको छ। २०७७ साल जेठ १० गते सोती गाउँमा २१ वर्षीय नवराज विक र उनका साथीहरूलाई गाउँलेहरूले मिलेर कुटपिट गरी हत्या गरेका थिए। यस घटनामा ६ जना युवाको ज्यान गएको थियो भने ११ जना घाइते भएका थिए।  

यसै घटनालाई स्मरण गर्दै आज हेटौंडाको बुद्धचोकमा संयुक्त दलित संघर्ष समिति मकवानपुरले रुकुम पश्चिम हत्याकाण्डका मृतकहरूको स्मृति तथा खबरदारी सभा आयोजना गरेको छ। कार्यक्रमको संचालन संयुक्त दलित संघर्ष समिति मकवानपुरका संयोजक एवम् मुक्ति समाजका केन्द्रीय सदस्य कमल कुमार विश्वकर्माले गर्नुभएको थियो। 

संयोजक विश्वकर्माले कार्यक्रमको औचित्य बताउँदै रुकुम घटनाको स्मृति गर्दै अपराधीहरूलाई कुनै पनि बहानामा रिहा नगर्न खबरदारी गर्नुभएको थियो। उहाँले विभिन्न नाराहरू समेत वाचन गर्नुभएको थियो। 

कार्यक्रममा मुक्ति समाजका केन्द्रीय सल्लाहकार युक्तलाल विश्वकर्माले पनि रुकुम घटनाबारे ध्यानाकर्षण गराउँदै खबरदारीसहित सभालाई सम्बोधन गर्नुभएको थियो।

कार्यक्रममा नेपाल उत्पीडित जातीय मुक्ति समाज, नेपाल दलित संघ, दलित मुक्ति मोर्चा, नेपाल राष्ट्रिय दलित संगठन र जात व्यवस्था उन्मूलन मोर्चाका केन्द्रीय सदस्यहरु, प्रदेश सदस्यहरू, जिल्ला पदाधिकारीहरू एवं सदस्यहरू लगायत दलित समुदायका व्यक्तिहरूको उपस्थिति रहेको थियो।

सो घटनामा परेर नवराज विकसहित ६ जनाले ज्यान गुमाएका थिए। जिल्ला अदालत रुकुम पश्चिमले २४ जनालाई जन्मकैदको फैसला सुनाउँदा आठ जनालाई सफाइ दिएको थियो। अदालतले विककी प्रेमिका र उनकी आमालाई जातीय छुवाछुतको कसुरमा कैद र जरिवाना तोकेको थियो।  

घटनाबारे अनुसन्धान समितिहरूले जातीय भेदभाव र छुवाछुत नै प्रमुख कारण भएको निष्कर्ष निकालेका थिए। यस घटनालाई सामाजिक न्यायका पक्षधरहरूले कालो दिन र अधिकारकर्मीहरूले प्रतिरोध दिवसको रूपमा मनाउने गरेका छन्।