रवि लामिछानेसहित तीनैजनालाई फेरि थप पाँच दिन थुनामा, बाहिर विरोध 

पत्रकार शालिकराम पुडासैनी आत्महत्या प्रकरणमा पक्राउ परेका टेलिभिजन प्रस्तोता रवि लामिछाने सहित ३ जनाविरुद्ध थप अनुसन्धान गर्न पुनः ५ दिनको म्याद थप गरिएको छ । चितवन जिल्ला अदालतले रविसहित न्यूज २४ टेलिभिजनका पत्रकार युवराज कँडेल र अस्मिता कार्की माथि थप अनुसन्धान गर्न ५ दिनको म्याद थप गरेको हो ।
चितवन जिल्ला अदालतले आज बिहानै अदालतमा उपस्थित गराएको थियो । प्रहरीले पोस्टमार्टम रिपोर्ट, भिडियोको डिजिटल ल्याब रिर्पोट लगायतका अन्य प्रमाणहरु अदालतमा पेश गरेको थियो । जिल्ला न्यायाधीश केशव अधिकारीले थप पाँच दिनको म्याद थप गरेका हुन् । यसअघि अदालतले अनुसन्धानका लागि ५ दिनको म्याद थप गरेको थियो ।
गत बिहीबार काठमाडौंबाट पक्राउ परेका लामिछाने, कँडेल र कार्कीलाई प्रहरीले शुक्रबार चितवन जिल्ला अदालतमा पेश गरेको थियो । अदालतले पहिलो पटक पाँच दिनको म्याद दिएर अनुसन्धान गर्न आदेश दिएको थियो ।
चितवन जिल्ला अदालतमा वहस चलिरहँदा बाहिर चर्को विरोध प्रदर्शन भइरहेको थियो । अदालत बाहिर पत्रकार लामिछानेका समर्थकहरुले प्रदर्शन गरेका हुन् । लामिछानेलाई अनुसन्धानका नाममा फसाउन खोजिएको भन्दै उनीहरुले निस्पक्ष अनुसन्धानको माग गर्दै आएका छन् । 

पत्रकार पुडासैनी गत साउन २० गते चितवनको कंगारु होटलमा झुण्डिएको अवस्थामा भेटिएका थिए । पुडासैनीले मृत्युअघि रेकर्ड गराएको भिडियोमा नाम मुछिएपछि उनीहरुलाई प्रकाउ गरि अनुसन्धान अघि बढाएको हो । 
उनीहरुमाथि लागेको अभियोग पुष्टि भएमा मुलुकी अपराध संहिता ऐन, २०७४’ को दफा १८५ बमोजिमको कारवाही हुनेछ ।  जस अनुसार  ५० हजारसम्म जरिवाना र पाँच वर्षसम्म कैदको व्यवस्था छ । तर, प्रहरीले पर्याप्त प्रमाण पेश गर्न नसकेको अवस्थामा सरकारी वकीलले नै मुद्दा अगाडि नबढाउने निर्णय पनि लिन सक्छन् ।