मकवानपुरको नौ स्थानीय तहमा आइसोलेसन निर्माण

कोरोना भाइरसको सङ्क्रमण दर बढ्दै गएको बेला मकवानपुरका ९ वटा स्थानीय तहले आइसोलेसन कक्ष तयार पारेका छन् । १० स्थानीय तह रहेको मकवानपुरमा इन्द्रसरोबर गाउँपालिकाबाहेक अन्य सबै पालिकाले आइसोलेसन निर्माण गरेका हुन् । 
जिल्लाको मनहरी गाउँपालिका र मकवानपुरगढी गाउँपालिकाले कोरोनो अस्पताल नै सञ्चालन गरेका छन् भने अन्य पालिकाहरुले विभिन्न क्षमताको आइसोलेसन स्थापना गरेर सञ्चालनमा ल्याएका छन् मनहरीको कोरोना अस्पतालमा २५ बेड क्षमता रहेको छ भने मकवानपुरगढीमा १० बेड रहेको छ । 
बागमती र कैलाश गाउँपालिकामा १०÷१० बेडको आइसोलेसन बनाइएको छ । हेटौंडा उपमहानगरपालिकाले १२० बेडको आइसोलेसन सञ्चालन गरिरहेको छ भने थाहा नगरपालिकामा २०, भीमफेदी गाउँपालिकामा ३५ र राक्सिराङ गाउँपालिकामा २६ बेडको आइसोलेसन निर्माण गरिएका छन् । बकैया गाउँपालिकामा ३० बेडको आइसोलेसन कक्ष तयारी अवस्थामा राखिएको छ । 
इन्द्रसरोबर गाउँपालिकामा आइसोलेसनको लागि आवश्यक सामग्री आइसकेको भए पनि आइसोलन स्थापना गरिने स्थानको टुङ्गो लाग्न नसक्दा ढिलाइ भएको स्वास्थ्य शाखा प्रमुख मन्नुनाथ अधिकारीले बताउनुभयो । इन्द्रसरोबरमा अहिले १५ जना कोरोनाका सक्रिय सङ्क्रमित रहेका छन् । 
कोरोनाको सङ्क्रण तीव्र हुँदै मकवानपुरमा निर्माण गरिएका सीमित बेड क्षमताको आइसोलेसनले धान्न सक्ने अवस्था भने नरहेको स्थानीय तहका प्रमुखहरुको भनाइ रहको छ । अहिले सामान्य लक्षण देखिएका बिरामीहरुलाई ‘होम आइसोलेसन’मा राखिएको हेटौंडा उपमहानगरपालिकाका प्रमुख हरिबल महतले बताउनु भयो । उपमहानगरपालिकाबाट सञ्चालित १२० बेडको आइसोलसनमा अहिले ३४ जना सङ्क्रमितहरुलाई राखिएको छ । 
थाहा नगरपालिकामा अहिले १६८ जना होम आइसोलेसनमा रहेका छन् भने नगरपालिकाले तयार पारेको २० बेडको आइसोलेसन खाली राखिएको छ । वागमती गाउँपालिकाको १० बेडको आइसोलेसनमा ९ जना रहेका छन् । 
मकवानपुरमा अहिले दुई हजार २४ जना सक्रिय सङ्क्रमित रहेको जिल्ला स्वास्थ्य कार्यालय मकवानपुरले जनाएको छ ।