भीमफेदी सुमो दुर्घटना अपडेट : मृतक र घाइते सबैकाे नाम खुल्याे

भीमफेदी गाउँपालिका–६ चिसापानीगढीमा आइतबार दिउँसो भएको सवारी दुर्घटनामा परी मृत्यु भएका तीनै जनाको नाम खुलेको छ ।

दुर्घटनामा परी मृत्यु हुनेहरुमा झापाको जोरपानी गाउँपालिका बस्ने २५ वर्षीया देवीकुमारी गिरी, मकवानपुरको हेटौंडा उपमहानगरपालिका–१३ पदमपोखरी (नागरिकता ठेगानाः पदमपोखरी–६) बस्ने २५ वर्षीय भिमबहादुर थिङ र मकवानपुरको राजन राना मगर (पासपोटको आधारमा) रहेका छन् ।

आइतबार दिउँसो हेटौंडाबाट काठमाडौंतर्फ जाँदै गरेको ना १ ज ४१०६ नम्बरको सुमो भीमफेदी–६ चिसापानीगढीबाट करिब डेढ सय मिटर तल सिमखोलामा खसेर दुर्घटना हुँदा थिङ र मगरको घटनास्थलमै मृत्यु भएको थियो ।

दुर्घटनामा परी गम्भीर घाइते भएकी गिरीको भने हेटौंडा अस्पतालमा उपचारको क्रममा मृत्यु भएको जिल्ला प्रहरी कार्यालय मकवानपुरका प्रवक्ता इन्द्रबहादुर रानाले जानकारी दिनुभयो ।

दुर्घटनामा परी अन्य ५ जना घाइते भएका छन् । घाइते हुनेहरुमा हेटौंडा उपमहानगरपालिका वडा नम्बर ३ बसामाडी बस्ने ३० वर्षीया शर्मिला थिङ, मकवानपुरगढी गाउँपालिका–४ बस्ने २७ वर्षीय सोमबहादुर गुरुङ, रौतहट रङ्गपुर गाउँपालिका बस्ने २९ वर्षीय सुजनकुमार काफ्ले, सुमो चालक भीमफेदी–४ घर भई हाल सामरी बस्ने विष्णु मगर र नाम, ठेगाना नखुलेको अन्दाजी ५ वर्षीय बालक रहेका छन् ।

घाइतेमध्ये शर्मिला थिङ, सुजन काफ्ले र सोमबहादुर गुरुङलाई  थप उपचारको लागि चितवनको भरतपुर अस्पताल लगिएको जिल्ला प्रहरी कार्यालय मकवानपुरले जनाएको छ ।

त्यस्तै, सुमो चालक विष्णु मगरको हाल चुरेहिल अस्पतालमा उपचार भइरहेको छ भने ती ५ वर्षीय बालकलाई सामान्य उपचारपश्चात हेटौंडास्थित एक शिशुस्याहार केन्द्रमा संरक्षणको लागि जिम्मा लगाएको प्रवक्ता रानाले जानकारी दिनुभयो ।