बिपन्न एकल महिलाहरुको लागि थाहा नगरले व्यावसायिक तरकारी खेती तालिम दियो।

थाहा नगरपालिकाका २४ जना एकल महिलालाई आयआर्जनका लागि व्यावसायिक तरकारी खेतीसम्बन्धी ३ दिने तालिम सञ्चालन गरिएको छ । नगरका एकल महिला स्वावलम्बन भई घरको आर्थिक अवस्था सबल बनाउने उद्देश्यले तालीममार्फत आयआर्जन स्वावलम्बन बनाइने योजना बनाइएको हो । 
एकल महिलालाई व्यावसायिक तरकारी खेतीमा आत्मनिर्भर गराई छोराछोरीको शिक्षा एवं परिवारमा सहयोग पुगोस् भन्ने उद्देश्यले नगरपालिका महिला बिकास शाखाको आयोजनामा तालीमको आयोजना गरिएको नगर प्रमुख बिष्णु बिष्टले बताए।
उनले एकल महिलालाई विभिन्न स्रोतमार्फत आयआर्जनमा सहयोग गर्दै स्वरोजगार बनाउनुपर्ने आवश्यकता औँल्याए । 
तिन दिने तालीममा बेमौसमी तथा मौसमी तरकारीखेती प्रविधि, नर्सरी स्थापना एवं व्यवस्थापन, तरकारी बाली, यिनका महत्व तथा मूल बीउ उत्पादनसम्बन्धी प्रशिक्षण दिइएको छ । प्रशिक्षणमा माटो परीक्षण एवं सुधार तथा तरकारी  खेतीका लागि आवश्यक प्राङ्गारिक मल प्रयोगका बारेमा एकल महिला कृषकलाई जानकारी गराइएको महिला बालबालिका शाखा प्रमुख प्रतिमा मोक्तानले बताइन।
तालिममा सहभागी एकल महिलाहरुले तालीममा व्यावसायिक तरकारी तथा फलफूल खेतीका लागि जैविक विषादी बनाउने विधि, रोग पहिचान, बालीअनुसार जैविक विषादी प्रयोग गर्ने मात्राबारे विस्तृक जानकारी पाइएको बताए।    
तालीममा सहभागी हरुलाइ तरकारीको बीउ किन्नको लागि प्रतिमहिला ५ हजार रुपैयाँ टेवा रकम वितरण गरिएको छ ।
थाहा नगरपालिकाको प्रत्यक वडाको २ जना गरि २४ जना एकल महिलाहरुको सहभागिता रहेको तालिममा सहभागी हरुलाइ थाहा नगरपालिकाका प्रमुख प्रशासकिय अधिकृत सुरेन्द्र प्रधानले प्रमाणपत्र तथा टेवा रकम प्रदान गरेका थिए।
२२ फागुन देखि सुरु भएको तालिम समापन समारोह थाहा ३ का कार्यवाहक वडा अध्यक्ष कृष्ण कुमार कार्कीको सभापतित्वमा भएको थियो।

तालिममा सहभागी हरुलाइ जनकल्याण माध्यमिक विद्यालयका कृषि शिक्षक द्वय संगिता थापा र प्रशान्त गिरीले सहजीकरण गरेका थिए।