बिपद व्यवस्थापनको लागि थाहामा सशस्त्र प्रहरीको अस्थायी बेस क्याम्प

थाहा,
थाहा नगरपालिकामा सशस्त्र प्रहरी बलको विपद् व्यवस्थापन एकाईको अस्थायी वेस क्याम्प स्थापना गरिएको छ। प्रहरी सहायक निरीक्षकको नेतृत्वमा विपद् व्यवस्थापनसम्बन्धी तालिमप्राप्त २० जना सशस्त्र प्रहरीको टोली थाहा नगरपालिका–१ मा रहेको सुनौलो सिकाइ केन्द्रको भवनमा खटिएको हो।
थाहा नगरपालिका, छिमेकी कैलाश र भिमफेदी क्षेत्रलाई लक्षित गर्दै विपद् जोखिम न्यूनीकरण, खोज तथा उद्धार कार्यलाई छिटो र प्रभावकारी बनाउने उद्देश्यले उक्त क्याम्प स्थापना गरिएको हो। यसअघि विपद् आइपरेको अवस्थामा कुलेखानीबाट टोली बोलाएर उद्धार कार्य गर्नुपर्दा समयमै प्रभावकारी सहायता पुर्‍याउन कठिन हुने गरेको थियो।
थाहा नगरपालिकाको सहजीकरणमा स्थापना गरिएको यो अस्थायी क्याम्पबारे नगरपालिका विपद् व्यवस्थापन समिति संयोजक तथा नगर प्रमुख विष्णु बिष्टले भने,यो बर्ष मौसम बिभागले धेरै बर्षा हुने भनिरहेको अवस्थामा  “थाहा नगर पहिरो, भूस्खलन,लगायत विविध विपद्का दृष्टिकोणले संवेदनशील क्षेत्र हो। सशस्त्र प्रहरी बलको  उपस्थितिले जोखिम न्यूनिकरण मात्र होइन, उद्धार तथा राहत कार्यमा समयमै प्रतिक्रिया दिन सहज बनाउनेछ।”
उनले थपे, “स्थानीय तहको अग्रसरतामा यस्तो पूर्वतयारीले विपद् व्यवस्थापनलाई थप सशक्त बनाउने विश्वास लिएको छौं।”
मेयर बिष्टले सशस्त्र प्रहरीलाई स्थायी रुपमै थाहामा राख्नको निम्ति पनि पहल गरिरहेको जानकारी दिए।