बाख्रादेखि बँदेलसम्म मार्ने चित्लाङको सामुदायिक कुकुर !

पहिलेपहिले भनिने भुस्याहा कुकुरलाई अहिले त्यस्तो भन्न पाइँदैन, भनिए पशुअधिकारबादीहरुले समाउँछन् । घरमा नबस्ने र लखरलखर हिँड्ने त्यस्ता कुकुरहरु अहिले सामुदायिक कुकुरको रुपमा चिनिन्छन् । तिनै सामुदायिक कुकुरहरु अहिले थाहानगरपालिका वडा नं. ९ चित्लाङको लागि भने टाउको दुखाइको विषय बनेको छ । 

स्थानीयहरुका अनुसार गाउँमा आक्कलझुक्कल देखिने र हमेसा जङ्गलमा बस्ने ती कुकुरहरुको समूहले अहिलेसम्म गाउँका बाख्रादेखि जङ्गलका बँदेलसम्म मारिसकेका छन् । विश्वकै दूर्लभ मानिने र नेपालको चित्लाङ बिसिङ्खेलमा व्यवसायिक रुपमा पालिएको अल्पकालाई समेत तिनीहरुले सिकार बनाइसकेका छन् । 

गाउँमा महिनौंदेखि आतङ्क मच्चाउँदै आएका ती कुकुरहरुको समूहले पछिल्लो पटक मंगलबार एकै दिन स्थानीय उत्तम लामिछानेको दुईवटा खसी र एउटा बाख्रा मा¥यो । अचम्म त के छ भने ती कुकुरहरुले लामिछानेको खोरको बन्द ढोका फुटाएर बाख्रा मारेका थिए । त्यही कुकुर समूहले केही दिन अघि मात्र चित्लाङ–९ विसिङ्खेलकै उमेश महतको २ वटा बाख्रा मारेको थियो भने एउटा घोर्ले खसी घाइते बनाएर छोडेको थियो । 

स्थानीयहरुका अनुसार ती जङ्गली सामुदायिक कुकुरहरुले मृग, कालिज र बँदेलसम्म मारिसकेका छन् । उनीहरु भन्छन्, ‘अब चितुवा मार्न पनि बेर लाउँदैनन् ।’ एक्लैदुक्लै मान्छे देखे झम्टिने गरेका कुकुरहरुले गाउँमा आतङ्क मच्चाएका छन् । 

कोरोना भाइरसले लकडाउन भएपछि घरमै बसिरहेका स्थानीय कुकुरले साह्रै दुःख दिन थालेपछि कुकुर आतङ्कबाट छुटकारा पाउन के गर्ने भन्नेबारे सोच्न सकिरहेका छैनन् । आतङ्क मच्चाउने कुकुरको गतिविधि नियन्त्रण गर्न उनीहरुले नगरपालिकामा निवेदन दिने तयारीसमेत गरेका छन् ।