बकैयाका विद्यार्थीलाई वडा द्वारा साइकल वितरण

मकवानपुर, ३१ बैशाख÷मकवानपुर जिल्लाको बकैया गाउँपालिका–१ स्थित सरस्वती माध्यमिक विद्यालयमा अध्ययन गर्ने बालबालिकालाई साइकल वितरण गरिएको छ । 
गाउँपालिकाको वडा नं. १ को कार्यालयले आफ्नो बार्षिक कार्यक्रम अन्तरगत साईकल बितरण गरेको हो ।
३ किलेमिटर टाढाबाट पैदल बिद्यालय आउने बिद्यार्थीहरुलाई विद्यालय आवतजावत गर्न सहज वातावरण सृजना गर्ने उद्देश्यले साईकल बितरण गरिएको वडाध्यक्ष आशिष तितुङले जानकारी दिए ।
भौगोलिक दुरी र साइकल चल्ने बाटो भएको आधारमा वडा कार्यालयले विद्यार्थी छनौट गरेको हो । साईकल नजाने टाढाका बिद्यार्थीहरुलाई वडाले बिद्यालय आसपास हेस्टलको ब्यवस्था गर्ने योजना रहेको समेत अध्यक्ष तितुङले बताए । 
वडाको एक मात्र माध्यमिक बिद्यालयमा कक्षा ६ देखि १० मा अध्ययन गर्ने ५५ जना विद्यार्थीलाई साइकल हस्तान्तरण गरिएको बिद्यालयका प्रधानाध्यापक सुकदेव अधिकारीले बताए । बिद्यार्थीको नियमित उपस्थितिका लागि टाढाका बिद्यार्थीलाई साईकल बितरण प्रभावकारी भएकोले यो कार्यक्रमको लागि वडा कार्यलयलाई प्रधानाध्यापक अधिकारीले धन्यवाद दिए ।
साईकल बितरण कार्यक्रममा प्रमुख अतिथि बकैया गाउँपालिका उपाध्यक्ष भक्तबहादुर खत्रीले पालिकाले विपन्न र सुविधाबाट वञ्चितमा परेका जनसमुदायलाई प्राथमिकता दिएको बताउनुभयो । कोहीपनि बालबालिका विद्यालयबाट बाहिर हुन नपरोस् भनेर गाउँपालिकाले विभिन्न कार्यक्रमहरु ल्याएको भन्दै उहाँले विद्यार्थीलाई मेहनत गरि अध्ययन गर्न आग्रह गरे ।