प्रतिबन्धित लागुऔषध सहित थाहा २ का एक युवक पक्राउ

मकवानपुरको थाहा नगरपालिका–२, अंगारेमा प्रतिबन्धित लागू औषधजन्य पदार्थसहित एक युवक पक्राउ परेका छन्।
फागुन १६ गते दिउँसो करिब १२:३० बजे उक्त क्षेत्रमा अवैध लागू औषध सेवन तथा बिक्री वितरण भइरहेको भन्ने विशेष सूचनाको आधारमा ईलाका प्रहरी कार्यालय पालुङको प्रहरी टोली खटिएको थियो। चेकजाँचका क्रममा भाङ्गखोरियाबाट पालुङतर्फ आउँदै गरेको बा.३१ प ३३४३ नम्बरको मोटरसाइकल रोकी जाँच गर्दा चालक वर्ष २५ का सागर देउलाको साथबाट विभिन्न प्रकारका प्रतिबन्धित लागू औषधजन्य पदार्थ बरामद गरिएको प्रहरीले जनाएको छ।
बरामद गरिएका सामग्रीमा Nitrazepam Tablets I.P 10g लेखिएको १२ चक्की, Spaspain लेखिएको ३० चक्की, Stagan 25 लेखिएको १० चक्की र Tramadol Hydrochloride Capsules IP 50mg लेखिएको ३० चक्की रहेका छन्। साथै नगद रु. ३३ हजार १९०, Vivo कम्पनीको दुई सिमकार्ड प्रयोग भएको एक थान स्क्रिन टच मोबाइल फोन र बा.३१ प ३३४३ नम्बरको १५० सीसी पल्सर मोटरसाइकल समेत प्रहरीले नियन्त्रणमा लिएको छ।
पक्राउ परेका देउलाविरुद्ध लागू औषधसम्बन्धी कसूरमा मुद्दा दर्ता गरी मिति २०८२ फागुन १७ गते मकवानपुर जिल्ला अदालतबाट म्याद थप अनुमति लिई थप अनुसन्धान भइरहेको ईलाका प्रहरी कार्यालय पालुङले जनाएको छ।