प्रकृति संवाद यात्रा सम्पन्न

मकवानपुर । विश्व वातावरण दिवसको अवसरमा टोल विकास संस्था नगर समन्वय समिति, हेटौंडा उपमहानगरपालिकाको आयोजनामा भइरहेको सप्ताहव्यापी कार्यक्रम अन्तर्गत आईतबार प्रकृति संवाद यात्रा सम्पन्न भएको छ । 

प्रकृति संवाद यात्रा टोल विकास संस्था नगर समन्वय समितिका अध्यक्ष ध्रुवप्रसाद अधिकारीको अध्यक्षता तथा हेटौंडा उपमहानगरपालिका वडा नं. १० का वडा अध्यक्ष फुर्वा लामाको प्रमुख आतिथ्यतामा सम्पन्न भएको हो। 

कार्यक्रममा हेटौंडाका विभिन्न विद्यालय तथा बाल क्लबहरूबाट ७५ जना बालबालिकाहरूको सहभागिता रहेको थियो। सहभागीहरूले वन विज्ञान अध्ययन संस्थाको प्राङ्गणभित्र रहेको जंगल, गार्डेन तथा जैविक विविधता स्थलहरूको अवलोकन गरेका थिए। साथै, वातावरणीय संरक्षणका विषयमा संवादात्मक शिक्षा दिइएको थियो।
कार्यक्रमलाई वन विज्ञान संकायमा अध्ययनरत विद्यार्थीहरूले सहजीकरण गरेका थिए। उनीहरूले वन संरक्षण, जैविक विविधता, जलवायु परिवर्तन लगायतका विषयमा सहभागीलाइ जानकारी गराएका थिए।
प्रमुख अतिथि वडा अध्यक्ष फुर्वा लामाले वातावरण संरक्षणलाई स्थानीय तहको प्राथमिकतामा राख्ने प्रतिबद्धता व्यक्त गर्दै भने, “हेटौंडा उपमहानगरपालिकाले वातावरणमैत्री नीति तथा व्यवहारमा जोड दिँदै आएको छ। यस्ता बालबालिकामुखी अभियानले वातावरणप्रतिको व्यवहारिक ज्ञान दिन्छन्, जुन दीर्घकालीन रूपमा निकै फलदायी हुन्छ।”
कार्यक्रम अध्यक्ष ध्रुवप्रसाद अधिकारीले बालबालिकाहरूको सक्रिय सहभागिताले भावी पुस्तामा वातावरणप्रतिको चासो र जिम्मेवारीको संकेत दिएको उल्लेख गर्दै भने, “हामी सबैको साझा प्रयासबाट मात्रै स्वच्छ, हरित र दिगो वातावरणको निर्माण सम्भव छ। प्रकृति संवाद यात्रा जस्ता कार्यक्रमले बालबालिकाहरूमा चेतना र जिम्मेवारीको भावना विकास गर्न सहयोग गर्छ।” 

कार्यक्रममा टोल विकास संस्था नगर समन्वय समितिका उपाध्यक्ष सति न्यौपाने, शान्ति श्रेष्ठ, उपमहासचिव देव कुमार श्रेष्ठ, सचिव चन्द्रावति पनेरू, पुन्यवती घिमिरे, सदस्यहरू सुरेश लामिछाने, उर्मिला राना मगर, कमला पौडेलका साथै सामुदायिक विकास तथा सचेतना नेपालका सचिव अनन्तकुमार बाँनिया लगायतको उपस्थिति रहेको थियो। 

सप्ताहव्यापी कार्यक्रम अन्तर्गत भोलि सोमबार बिहान ७ बजे हेटौंडा औद्योगिक क्षेत्रको खेलमैदानमा विशेष कार्यक्रम अन्तरगत खाली प्लास्टिकका बोतलसंग फलफूलका बिरुवा वितरण गरिनेछ। यस अभियानमार्फत वातावरण संरक्षणको सन्देश फैलाउनुका साथै खेरजाने प्लास्टिक व्यवस्थापनको चेतना अभिवृद्धि गराउने उद्देश्य रहेको अध्यक्ष अधिकारीले बताए।