न्याय सम्पादनमा मेलमिलापकर्ताको भुमिका अहम:- नगर प्रमुख बिष्ट

स्थानीय तहमा न्याय सम्पादनको लागि सहज पुराउने उद्देश्यले न्यायिक समितिका पदाधिकारीहरुको क्षमता विकासका लागि आयोजित पुनतार्जगी ३ दिने तालिम थाहामा सम्पन्न भएको छ ।
थाहा नगरपालिकाको वार्षिक स्वीकृत कार्यक्रम अनुसार नगर न्यायिक शाखाको  सहयोगमा थाहा नगरपालिका भित्र रहेका प्रत्येक वडाका सुचिकृत मेलमिलापकर्ताको लागि पुनः तार्जगी ३ दिने तालिम आयोजना गरेको थियो ।
१७ चैत देखि चलेको तालिमलाई १९ चैतमा थाहा नगर प्रमुख बिष्णु बिष्टले समापन गरेका छन।
समापन कार्यक्रमलाई सम्बोधन गर्दै नगर प्रमुख बिष्टले न्याय सम्पादनमा राजनीति पुर्वाग्रह नराख्न आग्रह गर्दै सामान्य विवाद गाउँस्तरमै मिलाउन सकिए न्यायिक समितिमा आइरहन नपर्ने बताए । उनले मेलमिलापकर्ताले गाउँ र टोलमा हुने सामान्य विवाद मिलाउन सके न्यायिक समितिमा देखिएको चाप कम हुने उल्लेख गरे ।
मेलमिलापकर्तामार्फत् विवादको निरुपण गरिए न्यायिक समिति र अदालतमा जाँदा हुने सर्वसाधारणको खर्चसमेत जोगिने दाबी गरे । “घरझगडा, साँधसिमाना, जग्गालगायतका सामान्य विवाद मेलमिलाकर्ताले मिलाए न्यायिक समितिमा आउँदा लाग्ने खर्च जोगिनेछ,” मेयर बिष्टले भने, “यसमा तपाईं मेलमिलापकर्ताहरूको भूमिका अहम् रहनेछ ।”
थाहा नगरका उपमेयर तथा न्यायिक समितिका संयोजक समेत रहेका भरत गोपालीले सर्वसाधारणको न्यायमा सहज पहुँचका लागि तालिम फलदायी हुने उल्लेख गरे । स्थानीयस्तरमा हुने सामान्य विवाद समाधानका लागि मेलमिलापकर्ताहरूको भूमिका महत्वपूर्ण हुने गोपालीको भनाइ थियो ।
तालिममा थाहा नगरपालिकाका न्यायिक समितीका संयोजक, नगर  कार्यपालिका सदस्य एवं समितिलाई सहयोग गर्ने वडा मेलमिलापकर्ता र वडा अध्यक्षहरुको सहभागिता थियो ।
तालिममा न्यायिक समितिको काम, कर्तब्य, अधिकारको बारेमा स्पष्ट हुन, फैसलामा आउने कठिनाई न्युनिकरण, न्यायिक समितीमा पर्ने उजुरीको फैसला गर्दा ध्यान दिनुपर्ने विषयहरुमा केन्द्रित रहेर अधिवक्ता जगन्नाथ सुवेदीलेले सहजीकरण गरेको थाहा नगरपालिका न्यायिक शाखाका सहजकर्ता गोपी कार्कीले  जानकारी दिइन।
तालिम समापन समारोहमा वडा न २ का अध्यक्ष बम बहादुर सिङ्तान,३ का अध्यक्ष हिरेन्द्र रायमाझी तथा सहभागीका तर्फबाट सुनिता दोङ र दिपक गोपालीले आफ्नो भनाइ राखेका थिय।
कार्यक्रममा दिपक गोपालीको संयोजकत्वमा १३ सदस्यीय मेलमिलाप कर्ताहरुको नगर स्तरीय तदर्थ समिती समेत गठन गरियको छ।
जस्को उपसंयोजकमा सुनिता दोङ र सचिवमा अर्जुन सुनार रहेका छन भने सदस्यहरुमा देवकी तामाङ,राजन ढकाल,लक्ष्मी रायमाझी ,मानसिंह दोङ,राम कुमार पुकार,दिपक लामा,मणिकलाल घलान,शान्तीमाया,रामकुमार मोक्तान र रोजिता खत्री रहेका छन।