नेपाली सेनाले बनायो “चिल्ड्रेन पार्क” भीमफेदी गाउँपालिकालाई हस्तान्तरण

मकवानपुर, नेपाली सेनाको पुरानो गोरख गणले भीमफेदी गाउँपालिकाको भैसे स्थित त्रिखण्डी मन्दीर परिषरमा “चिल्ड्रेन पार्क” निर्माण गरेको छ । भीमफेदीको आकर्षक पर्यटकीय गन्तब्यको रुपमा विकास हुँदै गएको उक्त क्षेत्रमा सेनाले नागरिक–सैनिक सम्वन्ध सुधार कार्यक्रम अन्र्तगत पार्क निर्माण गरेको हो ।
आज शुक्रबार मध्य पृतना हेडक्वाटरका पृतनापति शुवर्णबहादुर शाहाको प्रमुख आतिथ्यतामा एक कार्यक्रमको आयोजना गरि निर्माण सम्पन्न भएको पार्क भीमफेदी गाउँपालिकालाई हस्तान्तरण गरिएको छ । सात लाख रुपैँयाको लागत तथा ३ सय भन्दा सैनिकहरुको श्रमदानमा निर्माण भएको पार्कले मकवानपुर सहित उक्त क्षेत्रमा आउने अन्य क्षेत्रका वालवालिकाहरुलाई मनोरञ्जन प्रदान गर्ने आफुहरुले विश्वास लिएको हस्तान्तरण कार्यक्रममा बोल्दै पुरानो गोरखगणका गणपती अनिलकुमार बुढाथोकीले बताए ।
कार्यक्रममालाई सम्बोधन गर्दै भीमफेदी गाउँपालिकाका अध्यक्ष हिदम लामाले नेपाली सेनाले देशको स्वाधिनता रक्षाको लागि गौरवपुर्ण काम गर्नुको साथै आम नागरिकको जनजीवनमा प्रत्यक्ष फाइदा हुने कामहरु समेत गरेका भन्दै खुसी समेत ब्यक्त गरे ।सेनाले निर्माण गरेको पार्कको संरक्षणको जिम्मा आफुहरुको रहेको भन्दै उनले यो वर्ष मात्र त्रिखण्डी क्षेत्रको लागि १५ लाख रुपैँया बजेट विनियोजन गरेको समेत उनले जानकारी दिए । सेनाले निर्माण गरेको पार्कका शौचालय, वालवालिकाको लागि पिङ, चिप्लेटी सहितको मनोरञ्जनको सामग्री र प्रतिक्षालय रहेको छ ।