नागरिकलाई स्वच्छ खानेपानी खुवाउन नगरपालिका प्रतिबद्ध छ:-प्रमुख प्रशासकीय अधिकृत गिरी

विकासको प्राथमिकताको मोडल परिवर्तन गरेर भएपनि थाहाका नागरिकका लागि स्वच्छ खानेपानी सेवा पुर्याउनुपर्ने थाहा नगरपालिकाका प्रमुख प्रशासकीय अधिकृत कृष्ण गिरीले बताएका छन।
थाहा नगरपालिकामा आयोजित राष्ट्रिय खानेपानी गुणस्तर मापदण्ड,खाद्य स्वच्छता,खाद्य सुर,खाना र पानीबाट सर्ने रोगहरुको रोकथाम बिषयक २ दिने अभिमुखीकरणको समापन गर्दै अधिकृत गिरीले उक्त यस्तो बताएका हुन।उनले नागरिकलाई शुद्ध खानेपानी उपलब्ध गराउने दाइत्व राज्यकै भएकोले यसका लागि थाहा नगरपालिका प्रतिवद्द रहेको उल्लेख गरे।
अधिकृत गिरीले थाहा नगरपालिकाले खानेपानीका साथै खाद्य सुरक्षा,कृषिमा अन्धाधुन्ध प्रयोग हुँदै आएको बिषादी नियन्त्रणका लागि कामहरु संचालन गर्दै आइरहेको स्मरण गर्दै खानेपानी बोर्ड,स्वास्थ्य शाखा र कृषि शाखा लगायत सम्बन्धित शाखाहरुको सक्रियतामा यस्ता सचेतनामुलक कार्यक्रम समुदाय स्तरमा पुर्याउन निर्देशन दिए।
थाहा नगर स्वास्थ्य शाखाका प्रमुख मेघराज बलामीले थाहा नगरपालिकामा पोर्टेवल पानी परिक्षण गर्ने उपकरणको आवश्यकता भएको औल्याउँदै यसका लागि आगामी आर्थिक बर्षमा प्रक्रिया अघि बढाइने बताए।
कार्यक्रममा सहभागी बृहत खानेपानी उपभोक्ता समिती थाहा ४ का अध्यक्ष ओमकर बिष्टले एसओपी नै बनाएर मुहान सरसफाइका कार्यक्रमहरु समुदाय स्तरबाट कार्यान्वयन गरि मुहान क्षेत्र संरक्षण र तारबार लगाउनुपर्ने बताए।
उपभोक्ता समिती थाहा ३ का राजकुमार कार्कीले मापदण्डले तोके अनुरुपको समयमा खानेपानीको नमुना परिक्षणमा नगरले सहयोग गर्नुपर्ने बताउदै खानेपानीको भौतिक पुर्वाधार संरक्षणमा समेत खानेपानी बोर्डले ध्यान दिनुपर्ने बताए।
थाहा नगरपालिका स्वास्थ्य शाखाको आयोजना तथा नगर खानेपानी व्यवस्थापन बोर्डको सहकार्यमा भएको अभिमुखिकरण कार्यक्रमका सहभागी हरुलाइ हेटौंडा खानेपानी व्यवस्थापन बोर्डका माधव प्रसाद चौलागाईं,संजयकुमार न्यौपाने र पालुङ प्राथमिक स्वास्थ्य केन्द्रका प्रमुख डाक्टर गगन कार्कीले सहजीकरण गरेका थिए।
कार्यक्रममा थाहा नगर खानेपानी व्यवस्थापन बोर्डका पदाधिकारी,खानेपानी उपभोक्ता समितिका सदस्यहरु तथा नगरपालिकाका स्वास्थ्यकर्मी हरुको सहभागिता रहेको थियो।