थाहा महोत्सवमा जेष्ठ नागरिकलाई प्रवेश निशुल्क,विद्यार्थीलाई ७५ रुपैयाँ मात्र

यही मंसिर १४ गतेदेखिबाट थाहानगरमा हुने चौथो थाहा महोत्सवको लागि आयोजकले ७० बर्ष माथिका जेष्ठ नागरिकहरु लाई निशुल्क प्रवेशको व्यवस्था गरेको छ।मुख्य आयोजक थाहा नगर उद्योग वाणिज्य संघका अध्यक्ष पुरुषोत्तम ढकालका अनुसार प्रति व्यक्ति टिकट सय रुपैयाँ, विद्यार्थीलाई ७० रुपैयाँ र ७० वर्ष उमेर भन्दा माथिलाई निःशुल्क प्रवेशको व्यवस्था गरेको जानकारी दिनुभयो। 
स्टल निर्माणको कार्य अन्तिम चरणमा रहेको आयोजकले जनाएको छ । थाहा नगर उद्योग वाणिज्य संघको मुख्य आयोजना तथा थाहा नगरपालिकाको आयोजना र ईन्द्रायणी काला भैरव गुठिको सह आयोजनामा मंसिर २५ गतेसम्म थाहा नगरमा बृहत थाहा कृषि, पर्यटन तथा व्यापार साँस्कृतिक महोत्सव सञ्चालन हुदैछ ।
२ सय ५० वटा स्टल सञ्चालन गर्ने लक्ष्य लिएकोमा २ सय ३० वटा स्टल बुकिङ भइसकेको थाहा नगर उद्योग वाणिज्य संघका महासचिव जर्म श्रेष्ठले बताए।स्टल बुकिङ नहुन्जेलसम्म बुकिङ खुल्ला रहने श्रेष्ठले बताए। महोत्सवमा स्टल बुकिङ गर्दा अग्रिम ५० प्रतिशत रकम भुक्तान गर्नुपर्ने आयोजकले जनाएको छ ।

यसैगरी १० दिनसम्म सञ्चालन हुने महोत्सवमा ख्याती प्राप्त राष्ट्रिय कलाकारहरुको बेजोड प्रस्तुती पनि हुनेछ । अहिलेसम्म ४० जना राष्ट्रिय कलाकारसँग टुङ्गो लागिसकेको उनले जानकारी दिए ।

गत असोज ३० गते जिल्ला प्रशासन कार्यालय मकवानपुरले थाहानगर उवासंघलाई आगामी मंसिर १४ देखि २५ सम्म थाहा महोत्सव गर्न अनुमति दिएको थियो ।
अहिले स्टल निर्माणको कार्य धमाधम भैरहेको छ भने महोत्सव स्थल नजिकै चेक ड्याम लाई थुनी नौका बिहार बोटिङ मिनि ताल पनि निर्माण भैरहेको छ।