थाहा नगरमा पृथ्वी जयन्ती, विविध कार्यक्रम गरेर मनाइँयो

आज पृथ्वी जयन्ती, नेपाल एकीकरणका अभियन्ता पृथ्वीनारायण शाहको योगदान स्मरण गरेर थाहा नगरपालिका भित्र पनि विविध कार्यक्रम सहित मनाइयो।
३०२ औं पृथ्वी जयन्तीको अवसर पारेर थाहा नगरपालिका वडा न ४ मा अवस्थित साहारा रिसोर्टले पृथ्वी नारायण शाहको तस्बिरमा माल्यार्पण गरेको छ।
कार्यक्रम होटलमा आएका पाहुना हरुले नै मनाएका थिए भने राप्रपा थाहा नगर कमिटिले पनि औपचारिक कार्यक्रम सहित पृथ्वी जयन्ती मनाएको छ।
थाहाको दोबाटोमा सम्पन्न कार्यक्रममा जेष्ठ नागरिक लखन सिंह गोपालीले पृथ्वी नारायण शाहको तस्वीरमा माला लगाएर सुरुवात गरेका थिए।
राप्रपा थाहा नगर कमिटी अध्यक्ष नवीन रायमाझीको सभापतित्वमा सम्पन्न कार्यक्रममा राप्रपा मकवानपुर जिल्ला सदस्य दिपक थापा, तिर्थ बहादुर मोक्तानको बिशिस्ट आतिथ्यता रहेको थियो भने राप्रपा थाहा नगर समितिका पदाधिकारी तथा स्थानीयको बाक्लो उपस्तिथि रहेको थियो।
गोर्खाली राजा नरभूपाल शाह र रानी कौशल्यावतीका जेठा छोराका रूपमा विसं. १७७९ पुस २७ गते जन्मिएका शाहले बाइसे-चौबीसे राज्यमा छरिएर रहेका राज्यहरुलाई एकत्रित गरेर आधुनिक नेपाल निर्माण गरेका थिए । भौगोलिक रुपमा नेपाल एकीकरण गरेकाले शाहलाई  राष्ट्र निर्माताको उपमा समेत दिने गरिएको छ ।
लोकतन्त्र आएपछि औपचारिक रुपमा राष्ट्रिय एकता दिवस नमनाएको सरकारले यस वर्ष भने विविध कार्यक्रम गरेर पृथ्वी जन्यती मनाउँदैछ । लोकतन्त्रपछि गठन भएको सरकारले एकता दिवसको बिदा कटौती गरेको भए पनि सरकारले आज सार्वजनिक बिदा दिने निर्णय गरेको थियो।