थाहा नगरपालिकाले अग्रभागमा काम गर्ने ८ सय जनाको पिसिआर परीक्षण गर्ने

मकवानपुरको थाहा नगरपालिकाले नगरको अग्रभागमा खटिने ८ सय बढी व्यक्तिहरुको पिसिआर परीक्षण गर्ने भएको छ । काठमाण्डौं र हेटौंडामा कोरोना संक्रमितको संख्या बढ्दै जाँदा यी दुबै ठाउँको बीचमा रहेको थाहा नगरपालिकालाई पिसिआर परीक्षणको दायरा बढाउन दवाब बढेको छ ।

थाहा नगरमा हालसम्म १० जनामा कोरोना संक्रमित भेटिएकोमा ७ जना उपचार पछि निको भएर घर फर्किएका छन् भने ३ जना उपचारको क्रममा आइसोलेसनमा छन् । पछिल्लो पटक भारतको मोतिहारीबाट आएको एक जनामा कोरोना संक्रमित भेटिएको र कन्ट्याक्ट ट्रेसिङ गर्दा कम्तिमा १७ जनासँग सम्पर्कमा रहेको पाइएपछि नगरमा त्रास बढेको छ । स्थानीय सरकार, प्रशासन, पालुङ जेसीज, थाहा नगर उद्योग वाणिज्य संघ, लायन्स क्लब, बजार व्यवस्थापन समिति लगायतले मास्क, सेनिटाइजर, पञ्जा आदिको प्रयोग गर्न पटक पटक अनुरोध गरे पनि कार्यालय र पसलहरुमा समेत लागू भएको पाइएको छैन ।

सुरक्षाको उपाय नअपनाउने र सामाजिक दूरी कायम नगर्ने, नगराउनेलाई कारबाहीको प्रक्रिया थाल्ने तयारीसँगै नगरका अग्रभागमा काम गर्ने व्यक्तिहरुको स्वाब संकलन गरी पिसिआर परीक्षण गरिन लागेको थाहा नगरपालिकाका प्रमुख लवशेर विष्टले बताउनुभयो । १२ वटा वडा रहेको नगरपालिकाले अहिले प्रत्येक वडामा करिब ७० जनाको पिसिआर परीक्षण गर्न लागेको नगरप्रमुख विष्टले जानकारी दिनुभयो । घर बाहिर निस्किरहने, फिल्डमा काम गर्ने, भीडभाड र समूहमा काम गर्ने लगायत अग्रभागमा काम गर्ने ७० जनासम्मको सूची नगरपालिका कार्यालयमा पेश गर्न नगरपालिकाले सबै वडाहरुलाई पत्राचार गरिसकेको छ । नगर प्रमुखका अनुसार बैंक, वित्तीय संस्था, सहकारी, विद्यालय, नापी, मालपोत, संचार गृह, विद्युत प्राधिकरण, प्रहरी कार्यालय, संघसंस्था आदिमा काम गर्ने व्यक्तिहरुलाई पहिलो प्राथमिकतामा राखेर पिसिआर परीक्षण गरिनेछ । यही क्रममा जनप्रतिनिधिहरुको समेत पिसिआर परीक्षण गरिनेछ ।

दैनिक रुपमा स्थानीय पसलहरुमा भीडभाड बढ्दै गएकाले औषधि, खाद्यान्न, सैलुन, व्युटिपार्लर, किराना, सागसब्जी लगायतका पसलमा कार्यरत व्यक्तिहरुको पनि पिसिआर परीक्षण गर्न लागिएको नगरपालिकाले जनाएको छ । थाहा नगरपालिकामा हालसम्म ३ सय ९१ जनाको पिसिआर परीक्षण गरिएकोमा सबैभन्दा बढी वडा नं. ३ मा १ सय १७ जनाको परीक्षण गरिएको छ । यसअघि कोरोना संक्रमण हुनसक्ने शङ्काको आधारमा नगर र जिल्ला बाहिरबाट आएका व्यक्तिहरुमा पिसिआर परीक्षण गरिएको भए पनि अब अग्रभागमा काम गर्ने सबैको पिसिआर परीक्षण गरिने भएको हो ।

यसले नगरमा समुदायमा कोरोना फैलन सक्ने सम्भावनाको आँकलन गर्न सजिलो हुने पालुङ प्राथमिक स्वास्थ्य केन्द्रका डाक्टर सुवोध चापागाईंले बताउनु भयो । थाहा नगरपालिकाको कोभिड–१९ नियन्त्रण सचिवालयमा अहिले पिसिआर परीक्षणका लागि स्वाब संकलन गर्न प्रयोग गरिने भिटिएम तीन सयवटा मौज्दात छ । तत्कालै एक गैरसकारी संस्थाले थप एक हजार भिटिएम उपलब्ध गराउन लागेको नगर पालिकाका स्वास्थ्य शाखा संयोजक मेघराज बलामीले बताउनु भयो । थाहा नगरपालिकामा पिसिआर परीक्षण गर्ने प्रयोगशाला नभएकोले स्वाब संकलन गरेर हेटौंडास्थित किटजन्य रोग अनुसन्धान तथा तालीम केन्द्रको प्रयोगशालामा पठाउने गरिएको छ ।