थाहा नगरको नीति तथा कार्यक्रम प्रति स्थानिय राजनैतिक दलको मिश्रित प्रतिक्रिया

थाहा नगरपालिकाले आगामी आर्थिक बर्ष २०७८/०७९ को लागि ९५ करोड ६४ लाख ३२ हजार रूपैयाको बजेट प्रस्तुत गरेको छ ।
नगरको नवौ नगरसभामा उपप्रमुख खडग बहादुर गोपालीले नीति तथा कार्यक्रम कार्यान्वयनका लागि  ९५ करोड ६४ लाख ३२ हजार रूपैया बराबरको बजेट प्रस्तुत गर्नु भएको हो ।
जसमध्ये चालु खर्च तर्फ ८ करोड ५७ लाख ४५ हजार, पुँजीगत तर्फ ४२ करोड ७५ लाख ८१ हजार, सशर्त तर्फ ३२ करोड ३१ लाख ६ हजार, सामाजिक सुरक्षा तर्फ १२ करोड खर्च अनुमान गरिएको छ ।

थाहा नगरपालिकाको आगामी बर्षको नीति तथा कार्यक्रमको सन्दर्भमा राजनैतिक दलको धारणा भने मिश्रित आएको छ ।

थाहापाटीसँगको कुराकानीमा नेकपा माओवादी केन्द्र थाहा नगर अध्यक्ष अरुण रायमाझीले समग्रमा नीति तथा कार्यक्रम राम्रो भएको बताउनुएको छ । 
निर्वाचानका समयमा जनता सँग गरेका प्रतिवद्धता अनुसार थाहा नगरपालिकामा विकासका कामले गति लिएको र त्यसको पुर्णताका लागि यस वर्षको कार्यक्रमले समेट्ने बताउनु भयो । कार्यक्रममा के छ छैन भन्दा पनि यसको सकारात्मक कार्यान्यन भए ‘कृषि, पर्यटन र पुर्वाधार, थाहा नगरको विकासको आधार’ भन्ने नारा पुर्णता पाउने वताउनु भयो । 

नेकपा एमाले थाहा नगर सचिब कुमार नेगीले थाहानगरको आगामि बर्षको नीति तथा कार्यक्रम बस्तुनिष्ट नजिक रहेको, पुरानै कार्यक्रमको निरन्तरता मात्र भएको बताउनुभयो । पुरानै कार्यक्रमको निरन्तरतामात्र हुँदा कार्यक्रम तथा बजेटले खासै उत्साहित नबनाएको भन्दै केन्द्र र प्रदेशमुखि बजेटको कार्यान्वयनमा शंका रहेको बताउनुभयो ।

नेपाली कांग्रेस थाहा नगर सभापति योगेन्द्रमान श्रेष्ठले कार्यक्रममा आफ्नो दलको तर्फबाट दिएको सुझावहरु धेरैजसो समाबेस भएकोमा खुसी ब्यक्त गर्नुभयो । उहाँले समग्रमा नीति तथा कार्यक्रम राम्रो भएकाले कार्यान्वयनमा सकारात्मक सहयोग गर्ने  बताउनुभयो ।

जनता समाजवादी पार्टी बागमति प्रदेश कमिटि सदस्य इन्द्रबहादुर श्रेष्ठले बजेट जनमुखी भन्दापनि चुनाबमुखी रहेको बताउनुभयो । उहाँले प्राकृतिक श्रोत दोहोन नियन्त्रण बारे नीति कार्यक्रम समेटिनु पर्नेमा नसमेटिनुले नगरको प्राकृतिक श्रोत दोहोन नियन्त्रणमा नगरको चासो नदेखिएको प्रस्ट भएकाले त्यसको दीर्घकालिन असर पर्नेमा चिन्ता व्यक्त गर्नुभयो । कृषि पर्यटनको विकास गरेर समुद्ध नगर बनाउने नारा नारामा मात्र सिमित भएको त्यसलाई बजेटले सम्बोधन गर्न नसकेको पनि बताउनु भयो । 

बिवेकशिल साझा पार्टीका थाहा नगर अध्यक्ष माधब कार्कीले नीति तथा कार्यक्रममा कृषि र पर्यटनमा भन्दा पनि सडक निर्माणमा बजेट केन्द्रित रहेकाले खासै नयाँ कुरा आउन नसकेको बताउनुभयो । उहाँले समग्रमा कार्यक्रम राम्रै भएको बताउनुभयो । साथै बजेटको प्रभावकारी कार्यान्वयनका लागि पनि अनुरोध गर्नुभयो ।

राप्रपा नेपाल थाहा नगर अध्यक्ष नबिन रायमाझीले युवा स्वरोजगार र पर्यटनको विषयमा स्पष्ट कार्यक्रम नाअए पनि समग्रमा कार्यक्रम राम्रो भएको बताउनुभयो ।