थाहामा कारोना नियन्त्रणबारे आकस्मिक बैठक चल्दै

थाहा नगरपालिकामा कोरोना भाइरसको जोखिम बढ्दै गएपछि कसरी नियन्त्रण र रोकथाम गर्न सकिन्छ भन्ने विषयमा अहिले आकस्मिक बैठक चलिरहेको छ ।

नगरमा रहेका राजनीतिक दल, थाहा नगर उद्योग वाणिज्य संघ, होटल एसोसिएसन, सहकारी संजाल, सुरक्षाकर्मी लगायतका प्रनितिधिहरुको सहभागितामा नगरपालिकाले आकस्मिक रुपमा सर्वपक्षीय बैठककोे आयोजना गरेको हो । 

अहिलेको विषम परिस्थितिमा थाहा नगरमा कोरोनाको जोखिम कम गर्न कसरी सकिन्छ भन्ने विषयमा सरोकारवालाहरुको धारणा बुझ्न सर्वपक्षीय बैठकको आयोजना गरिएको थाहा नगरपालिकाका उपप्रमुख खड्ग गोपालीले जानकारी दिनुभयो । 

सर्वपक्षीय बैठक थाहा नगरपालिकाका उपप्रमुख खड्ग गोपालीको अध्यक्षतामा चलिरहेको छ । 

थाहामा कोरोना नियन्त्रण  र रोकथामबारे अन्तिम निर्णय भने थाहा नगरपालिकाको कार्यपालिका बैठकले गर्नेछ । राजनीतिक दलसहित सरोकारवालाहरुको धारणा बुझेर त्यसैको आधारमा निष्कर्षमा पुग्न नगरपालिकाले कार्यपालिका बैठक बस्नुअघि सर्वपक्षीय बैठकको आयोजना गरेको हो । 

नगरपालिकाले भोलि मंगलबार कार्यपालिका बैठक तय गरेको छ । 

पछिल्लो पटक थाहामा दुई जनामा कारोना संक्रमण देखिएको र थाहा नगर आएर फर्किएलगत्तै ग्लोबल आइएमइ बैंक हेटौंडाका शाखा प्रमुखलाई कोरोना देखिए पछि थाहा नगरपालिकामा त्रास बढेको छ । ग्लोबल आइएमइ बैंकका शाखा प्रमुखको ट्राभल हिस्ट्रीमा थाहा नगरपालिकाका व्यक्तिहरु पनि जोडिए पछि नगरमा बढी जोखिम महशुस गरिएको छ ।