थाहामा कहाँ बाट आउँछ किङ्ग कोब्रा जातका सर्प

दावा सेर्पा थाहापाटी/ बिश्वब्यापी रुपमा बढिरहेको तापक्रम संगै ठाउँ अनुसार यसका नकारात्मक तथा सकारात्मक असरहरु देखा परिरहेका छन् । अत्यधिक गर्मीको कारण त्यस्ता  क्षेत्रहरूबाट शितल स्थान  तर्फ  प्रायः जंगली जनावरहरु अस्थायी रूपमा बसाइ सर्न थालेका छन् । यसको केही उदाहरण हाल हाम्रो थाहा नगरमा देख्न सकिन्छ । गत हप्ता मात्र थाहा-५ तसरमा एसियाली किङ्ग कोब्राको जोडि देखा परेको थियो। गाउँ नजिकैको जङ्गलमा ठूलो रुखको फेद मुनि  गुँड बनाई अन्डा कोरली बसिरहेको अवस्थामा देखेको स्थानीय सुमन वाइबाले बताए । हेर्दा करिब १५ फूट लामो देखिने  सो सर्प त्यहाँ  ७ दिनसम्म फ्यानको मारेर बसेको र पछि हेर्ने जाने मानिसहरुको उपस्थिती धेरै भएपछि त्यहाँबाट भागेको थियो। सर्प बसेको स्थानमा स्थानीयहरुले खोतलेर हेर्दा ३६ वटा अन्डा भेटाएका थिए। ती सबै अन्डाहरु बच्चाहरुले  फुटाईदिएको र केही अन्डामा सर्पको भ्रुण बिकास भैसकेको प्रत्यक्षदर्शीहरुले भने।

संसारमा पाइने सबैभन्दा ठूलो र लामो अति बिषालु सर्पको जात  किङ्ग कोब्रा हो। यसको एक थोपा न्युरोटक्सिन  विषले २० जना मानिस या एक वयस्क हात्तीको ज्यान लिन सक्तछ। यो जातको सर्पले २०-४० वटा अन्डा पार्दछ भने  सर्पको जाति मध्य किङ्ग कोब्राले मात्र पात-पतिङ्गरको गुँड बनाई अन्डा कोरल्ने गर्दछ।  यो जातको सर्पको प्रमुख बास स्थान पुर्बी र दक्षिणी एसिया हो। 

२ वर्ष अघि थाहा नगरपालिको चित्लाङ्गमा  पनि किङ्ग कोब्रा देखिएको थियो र वन्यजन्तु संरक्षण बिभागलाई खबर गरि सो कोब्रालाई सुरक्षित स्थानमा लगिएको थियो। यसरी थाहा नगरको अन्य स्थानहरुमा पनि किङ्ग कोब्रा देखिएको घटनाहरु प्रत्येक वर्ष देख्न र सुन्नमा आएको छ तर सर्पको टोकाइबाट  हालसम्म कुनै पनि घटना भने घटेको छैन। यदि यस  जातिको सर्पलाई यहाँको हावापानी पच्ने रहेछ भनी नगरपालिकाले कुनै एक सुरक्षित क्षेत्र छुटाई यी जातको सर्पको संरक्षण गर्नुपर्दछ, जसले गर्दा पर्यटन प्रवर्द्धन,औसधि उत्पादन एवम् वातावरण संरक्षणमा पनि अमुल्य योगदान गर्नेछ ।