थाहामा आयो १३५ बोरा युरिया मल, कसलाई दिने कसलाई नदिने ?

थाहा नगरपालिकामा शनिबार एक सय ३५ बोरा युरिया मल आएको छ । साल्ट ट्रेडिङ कम्पनी हेटौंडाले थाहाका विभिन्न ७ वटा सहकारीहरुलाई गरी सो परिमाणमा मल पठाएको हो । प्रत्येक सहकारीलाई २० बोराको दरले मल पठाएको कम्पनीका शिब श्रेष्ठले जानकारी दिनुभयो । 

यसरी थाहामा मल भित्र्याउने सहकारीहरुमा पालुङ बहुउद्धेश्यीय सहकारी संस्था, दामन कृषि सहकारी संस्था, सेतीगणेश कृषि सहकारी संस्था, कालीदेवी बहुउद्धेश्यीय सहकारी संस्था, जनशक्ति कृषि सहकारी संस्था, वागेश्वरी कृषि सहकारी संस्था र चित्लाङको स्वच्छन्द साना किसान सहकारी संस्था रहेका छन् । चित्लाङको स्वच्छन्द सहकारीले १५ बोरामात्र मल पाएको छ । 

मलको अभाव भएकोले थोरै परिमाणमा मात्र मल पठाउन सकेको कम्पनीले जनाएको छ । थोरै परिमाणमा मल आएकोले सहकारीहरुलाई कृषकलाई वितरण गर्न हम्मे परेको छ । पालुङ बहुउद्धेश्यीय सहकारीले २५ किलोको दरले ४० जना कृषकलाई मल वितरण गरेको छ भने वागेश्वरी सहकारी संस्थाले १५ किलोको दरले ६५ जनालाई मल वितरण गरेको छ । 

सहकारीमा मल आएको जानकारी पाएपछि कृषकहरु आज विहानै सहकारीको गोदाममा पुगेका थिए । तर १५–२० किलोसमेत नपाएर धेरै किसानहरु रित्तै फर्किएका थिए । १५ किलोको दरले वितरण गर्दा पनि पु¥याउन नसकिएको वागेश्वरी कृषि सहकारी संस्थाका सञ्चालक राजेन्द्र विष्टले बताउनु भयो ।