थाहानगरमा आरडिटी पोजिटिभको संख्या ३ पुग्यो, इन्द्रसरोबरमा आरडिटी पोजिटिभ देखिएकोमा पिसिआर नेगेटिभ

थाहा नगरपालिकामा आरडिटी विधिबाट परीक्षण गर्दा रिपोर्ट पोजिटिभ देखिनेहरुको संख्या ३ पुगेको छ ।   थाहा नगरपालिका स्थायी घर भएका उनीहरु दुई पुरुष र एक महिला रहेका छन् । आरडिटी पोजेटिभ देखिएकाहरु मध्ये एक महिला र एक पुरुष काठमाण्डौंबाट आएका थिए भने अर्का पुरुष चितवनबाट आएका थिए । 

नगरपालिका बाहिरबाट आएको भन्ने सूचनाको आधारमा सम्पर्क गरी उनीहरुको आरडिटी परीक्षण गरिएको थियो । आरडिटी विधिबाट परीक्षण गर्दा पोजिटिभ रिपोर्ट आएपछि अब उनीहरुको स्वाब पिसिआर विधिबाट परीक्षण गर्न प्रयोगशाला पठाइने डा. सुवोध चापागाईंले बताए ।   

यसअघि थाहानगरमा विदेशबाट आएका ४२ जना र कोरोना संकास्पद ठानिएका ३४ गरी ७६ जनाको आरडिटी परीक्षण गर्दा सबैमा रिपोर्ट नेगेटिभ आएको थियो । विहीबार चित्लाङमा १३ जनाको आरडिटी परीक्षण गरिएकोमा उनीहरुको रिपोर्ट पनि नेगेटिभ आएको थियो । 

त्यस्तै, कोरोना जोखिम क्षेत्रबाट आएका ६४ जनाको पिसिआर परीक्षण गर्दा सबैमा रिपोर्ट नेगेटिभ आएको थियो । पछिल्लोपटक परीक्षण गर्दा ३ जनामा रिपोर्ट पोजिटिभ आएपछि उनीहरुलाई क्वारेन्टाइनमा राखिएको छ । 

कहिलेकाहीँ उपकरणको समस्याका कारण पनि रिपोर्ट पोजिटिभ देखिने र आरडिटी पोजिटिभ देखिँदैमा पिसिआर रिपोर्ट पनि पोजिटिभ नै आउँछ भन्ने पनि ग्यारेन्टी नभएकोले यसबारे संयमता अपनाउन र धैर्य रहन थाहा नगरपालिकाका प्रमुख लवशेर विष्टले आग्रह गरेका छन् ।

इन्द्रसरोबर गाउँपालिकामा एक महिलामा आरडिटी पोजेटिभ देखिएकोमा पिसिआर रिपोर्ट नेगेटिभ आएको छ । हेटौंडास्थित प्रयोगशालामा पिसिआर परीक्षण गर्दा रिपोर्ट नेगेटिभ आएको गाउँपालिकाका प्रमुख प्रशासकीय अधिकृत दान बहादुर ऐडीले विज्ञप्ती नकालेर जानकारी दिएका छन् । 

यसअघि भीमफेदी गाउँपालिकाका एक जना कर्मचारीमा आरडिटी रिपोर्ट पोजिटिभ आएकोमा पिसिआर विधिबाट परीक्षण गर्दा रिपोर्ट नेगेटिभ आएको थियो ।