थाहानगरको २ जनामा आरडिटी पोजिटिभ

थाहा नगरपालिकामा आरिडी विधिबाट परीक्षण गर्दा शुक्रबार पहिलोपटक दुई जनामा पोजिटिभ देखिएको छ । थाहा नगरपालिका स्थायी घर भएका उनीहरु एक जना काठमाण्डौं र अर्को व्यक्ति चितवनबाट आएका थिए । 

नगरपालिका बाहिरबाट आएको भन्ने सूचनाको आधारमा सम्पर्क गरी उनीहरुको आरडिटी परीक्षण गरिएको थियो । आरडिटी विधिबाट परीक्षण गर्दा पोजिटिभ रिपोर्ट आएपछि अहिले उनीहरुको स्वाब संकलन गरी पिसिआर विधिबाट परीक्षण गर्न प्रयोगशाला पठाउने तयारी भइरहेको थाहापाटी श्रोतले बताएको छ ।  

यसअघि थाहानगरमा विदेशबाट आएका ४२ जना र कोरोना संकास्पद ठानिएका ३४ गरी ७६ जनाको आरडिटी परीक्षण गर्दा सबैमा रिपोर्ट नेगेटिभ आएको थियो । 
त्यस्तै, कोरोना जोखिम क्षेत्रबाट आएका ६४ जनाको पिसिआर परीक्षण गर्दा सबैमा रिपोर्ट नेगेटिभ आएको थियो । 

शुक्रबार परीक्षण गर्दा २ जनामा रिपोर्ट पोजिटिभ आएपछि उनीहरुलाई बज्रवाराहीस्थित अध्याय रिसोर्टमा स्थापना गरिएको क्वारेन्टाइनमा पठाउने की होम क्वारेन्टाइनमा पठाउने भन्ने बारे अहिले छलफल चलिरहेको छ । 

कहिलेकाहीँ उपकरणको समस्याका कारण पनि रिपोर्ट पोजिटिभ देखिने र आरडिटी पोजिटिभ देखिँदैमा पिसिआर रिपोर्ट पनि पोजिटिभ नै आउँछ भन्ने पनि ग्यारेन्टी नभएकोले यसबारे संयमता अपनाउन र धैर्य रहन थाहा नगरपालिकाका प्रमुख लवशेर विष्टले आग्रह गरेका छन् ।

यसअघि भीमफेदी गाउँपालिकाका एक जना कर्मचारीमा आरडिटी रिपोर्ट पोजिटिभ आएकोमा पिसिआर विधिबाट परीक्षण गर्दा रिपोर्ट नेगेटिभ आएको थियो ।