थाहानगरकाे ७ वर्षीय बालक सतुङ्गलमा सङ्क्रमित भेटिए

गएको बैशाख २९ गते थाहानगरबाट हिँडेर गएका एक बालक काठमाडौंको सतुंगलमा कोरोना संक्रमित भएको पाइएको छ । शुक्रबार साँझ स्वास्थ्य मन्त्रालयले सार्वजनिक गरेको थप ९ जना संक्रमित मध्ये सतुङ्गलको भनिएको सात वर्षीय बालक थाहा नगरपालिकाका हुन् ।  

चन्द्रागिरी नगरपालिका वडा नं. १० का वडाअध्यक्ष कृष्णगोपाल महर्जनले शुक्रबार साँझ संक्रमित भेटिएको बालक पालुङको भएको बताए । 

थाहापाटी श्रोतका अनुसार उक्त बालक सतुङ्गलमा आमाबुवासँग बस्दै आएका थिए । लकडाउनको बेला थाहानगरमै रहेका बालक र बालकको आमालाई लिन सतुङ्गलबाट बुबा र बुबासँगै काम गर्ने अर्का व्यक्ति आएका थिए । बालकसहित उनीहरु गत बेशाख २९ गते हिँडेरै सतुङ्गल पुगेका थिए । 

छिमेकमा पानी बोक्ने ट्याङ्कर चलाउने व्यक्ति पालुङ पुगेर फर्किएको र परिवारका अरु सदस्यहरु पनि ल्याएपछि छिमेकीहरुले वडालाई खबर गरेका थिए । 

शुक्रबार आमाछोरालाई कोरोना परीक्षण गरिएकोमा छोरालाई मात्र कोरोना देखिएको छ । छोरालाई कोरोना पोजिटिभ देखिएपछि आज शनिबार उनको बुवालाई पनि परीक्षणका लागि लगिएको छ ।

वडा अध्यक्ष महर्जनका अनुसार उनको परिवार बस्ने घरमा घरधनी सहित ४३ जना बस्छन् । सो घर १४ दिनका लागि सिल गरिएको छ । त्यहाँ सुरक्षाकर्मी र स्वास्थ्यकर्मी खटिएका छन् ।    

संक्रमित बालकलाई हाल बलम्बुस्थित सशस्त्र प्रहरीको अस्पतालको आइसोलेशनमा राखिएको छ ।