थाहाको वडा न १ र ३ का बालक्लबका पदाधिकारीलाई अभिमुखिकरण

थाहा (मकवानपुर) —
थाहा नगरपालिकाको वडा नम्बर १ र ३ लाई बालमैत्री वडा घोषणा सभाको तयारी थालिएको छ। आगामी भदौ १३ गते यी दुई वडालाई बालमैत्री वडा घोषणा गरिसकिएको अवस्थामा सभा मार्फत कार्यक्रम गरिँदैछ।

यसैक्रममा, बाल क्लबका प्रतिनिधिहरूलाई अभिमुखीकरण तथा क्षमता अभिवृद्धि तालिम दिइएको छ। तालिममा सहभागी बालप्रतिनिधिहरूलाई उद्घोषण, कार्यक्रम सञ्चालन तथा बालमैत्री वडाका सूचकहरू सम्बन्धी आधारभूत जानकारी प्रदान गरिएको हो।

तालिममा थाहा नगरपालिका सूचना अधिकारी सुरजकुमार भुजेल र बालकल्याण अधिकृत अनिल लामिछाने ले सहजीकरण गरेका थिए।

फोकल पर्सन लामिछानेका अनुसार वडा नं. १ र ३ ले बालमैत्री वडा घोषणाका लागि आवश्यक सूचक प्राप्त गर्ने तयारीको चरण, पूर्वतयारी, नीति तथा योजना तर्जुमा र कार्यान्वयन, अनुगमन–मूल्याङ्कन तथा प्रतिवेदन तयार गर्ने चरण र दिगोपनाको चरणसमेत पूरा गरिसकेको बताए।

उनले वडा स्तरमा टोल–टोलमा पुगेर बालमैत्री सूचकहरू पुरा गर्नका लागि विभिन्न गतिविधिहरू सञ्चालन गरिएको जानकारी दिए।

थाहा नगरपालिकाले बाल अधिकार सुनिश्चित गर्न बालमैत्री वातावरण निर्माणका लागि नीति निर्माणदेखि व्यवहारिक अभ्याससम्मको पहल अघि बढाएको जनाएको छ।