थाहाको वडा नं. ५ कार्यालयमा अज्ञात समूहल आगजनी, भूकम्पपीडितको फाइल जलेर नष्ट 

जेसीवी र ट्रिपरमा आगजनी भएको एक साता नवित्दै मकवानपुरको थाहा नगरपालिकामा अर्को आगजनीको घटना भएको छ । अज्ञात समूहले मकवानपुरस्थित थाहा नगरपालिकाको वडा नं. ५ कार्यालयमा आगजनी गरेको छ । आइतबार राति करिब साँढे ११ बजे भएको आगजनीबाट कार्यालयको सम्पूर्ण कागजपत्रहरु, फर्निचर र अन्य कार्यालय सामग्रीहरु जलेर पूर्णरुपमा नष्ट भएको थाहा नगरपालिका–५ का वडा अध्यक्ष विष्णुबहादुर गुरुङले बताए । 
झ्यालढोकाका खापाहरुसमेत जलेर नष्ट भएको अध्यक्ष गुरुङले बताए । आगजनीकर्ताले कार्यालय भवनको ढोका फोडेर भित्र पसी पेट्रोल छर्किएर आगो लागाएको वडा अध्यक्ष गुरुङले बताए ।  आगजनीका कारण विद्युतको मिटर पड्केपछि स्थानीयले घटनाबारे थाहा पाएका थिए । स्थानीयले आगो नियन्त्रणमा लिने प्रयास गरे पनि कार्यालयमा रहेका डकुमेन्टहरु जोगाउन नसकिएको स्थानीयले बताएका छन् । 
आगजनीबाट अन्य महत्वपूर्ण कागजपत्रहरुसँगै थाहा ५ का भूकम्पपीडितहरुको कार्यालयमा रहेको फाइल जलेर पूर्णरुपमा नष्ट भएको छ । 
आगजनी घटनाको जिम्मेवारी अहिलेसम्म कसैले नलिए पनि नेकपा विम्लब समूहले गराएको हुन सक्ने आशंका गरिएको छ ।  घटनाको खबर पाएपछि इलाका प्रहरी कार्यालयबाट एक टोली राती नै घटनास्थल पुगेको थियो । घटनाको अनुसन्धान भइरहेको इलाका प्रहरी कार्यालय पालुङका प्रमुख प्रहरी निरीक्षक लोकबहादुर गुरुङले बताए । 
स्थानीय तहको निर्वाचनपछि १२ वडा रहेको थाहा नगरपालिकामा पहिलोपटक आफ्नै भवन निर्माण गरेर वडा नं. ५ मा गत २०७५ पुस १ गतेदेखि कामकाज शुरु गरिएको थियो ।