थाहाको बजेट : कृषि र स्वास्थ्यलाई प्राथमिकता

थाहा नगरपालिकाको आगामी आथिक वर्ष २०७७–०७८ को बजेटमा कृषि र स्वास्थ्यलाई प्राथमिकता दिइएको छ । 

थाहाको सातौं नगरसभाले पारित गरेको बजेटमा नगर तथा वडास्तरका योजनहरुमा समेत कृषि र स्वास्थ्यलाइ प्राथमिकता दिइएको हो । 

बजेट अनुुसार कृषि विकास शाखाको बजेट २ करोड ६ लाख ५० हजार रुपिया रहेको छ भने स्वास्थ्य शाखाको बजेट ६ करोड ५२ लाख ५१ हजार रुपिया रहेको छ । यसबाहेक नगर र वडाहरुले विभिन्न शीर्षकमा बजेट विनियोजन गरेका छन् । 

नगरपालिकाले आगामी वर्षका लागि बाँझो जमिन व्यवस्थापनका लागि ७ लाख, हाट बजार व्यवस्थापनको लागि ५ लाख, किसान स्वास्थ्य सुरक्षा कार्यक्रमको  लागि १ लाख र तरकारी मूल्य समर्थन सर्वेक्षणका लागि ३ लाख बजेट वनियोजन गरेको छ । 

त्यस्तै १५ सैया अस्पताल संचालनको लागि २० लाख, गरिव स्वास्थ्य बिमाको लागि ११ लाख, कोरोनाबाट मृत्यु हुनेलाई सहयोगको लागि ५ लाख र मनोसामाजिक परामर्श केन्द्र संचालनको लागि १ लाख ५० हजार रुपिया बजेट विनियोजन भएको छ  ।

कृषिका लागि वडा नं. १ ले ७ लाख, वडा नं. ३ ले ५ लाख, वडा नं. ४ ले १० लाख, वडा नं. ५ ले ५ लाख, वडा नं. ८ ले ५ लाख , वडा नं. ११ ले ५ लाख र वडा नं. १२ ले १० लाख बजेट विनियोजन गरेको छ । त्यस्तै वडा नं. २ ले कृषि तथा स्वस्थ्य शीर्षकमा ५ लाख र वडा नं. ६ ले शिक्षा, स्वास्थ्य, कृषि र सिँचाइअन्तर्गत १२ लाख रुपियाँ विनियोजन गरेको छ । वडा नं. ९ ले भण्डारखर्क कृषि सडक शीर्षकमा ७ लाख बजेट छुट्याएको छ । 

नगरपालिकाको सातौं नगरसभाले आगामी आर्थिक वर्षको लागि ८५ करोड ४६  लाख ३३ हजार रुपियाको बजेट पारित गरेको छ ।