थाहाका संक्रमित बालक चढेको गाडीका चालक सम्पर्कमा, स्वाब परीक्षणका लागि पठाइयो 

थाहा नगरपालिका–७ का कोरोना संक्रमित ७ वर्षीय बालक चढेको गाडीको चालक सम्पर्कमा आएका छन् । चन्द्रागिरी नगरपालिका–१० सतुङ्गलमा संक्रमित भेटिएका बालक थाहा नगरपालिकाको रहेको पुष्टि भएपछि कन्ट्याक्ट ट्रेसिङको आधारमा बालक चढेको गाडी चालकलाई स्वाव परीक्षणका लागि प्रयोगशाला पठाइएको छ ।

साँखु बस्दै आएका गाडी चालकलाई बौद्धमा सम्पर्क गरी आइतबार प्रयोगशाला पठाइएको थाहा नगरपालिकाका प्रमुख लवशेर विष्टले जानकारी दिए । बालक तरकारी बोक्ने उक्त गाडीमा चालकसँगैको सिटमा बसेर गत बैशाख २९ गते सतुङ्गल पुगेका थिए । 

सोही गाडीमा सँगै गएका बालकको आमाको यसअघि नै रिपोर्ट नेगेटिभ आइसकेको छ । पेसाले पानी बोक्ने गाडी चलाउने बालकको बाबु र उनको सहचालकको पनि पिसिआर विधिबाट कोरोना परीक्षण गरिएको छ, उनीहरु सबैको रिपोर्ट आज आउने नगर प्रमुख विष्टले बताए ।

बालकको सम्पर्कमा रहेका थाहा–७ चल्तीका घरपरिवारका व्यक्तिहरु र थाहा–७ गैरीगाउँका मावलीका व्यक्तिहरु गरी ११ जनाको रिपोर्ट पनि आज सोमबार नै आउँदैछ । उनीहरुको हिजो अबेर पिसिआर विधिबाट परीक्षण गरिएको थियो । 

पिसिआर परीक्षणका लागि थाहानगरमा २० जना अहिले हेटौंडास्थित आइसोलेसन वार्डमा रहेका छन् ।