थाहाका दुई जनामा कोरोना पुष्टि, सम्पर्कमा आएका ८ जनालाई क्वारेन्टाइन पठाइयो

थाहा नगरपालिकाको दुई जनालाई शुक्रबार कोरोना भाइरसको संक्रमण पुष्टि भएको छ । हेटौंडाको किटजन्य रोग तथा अनुसन्धान तालिम केन्द्रमा पीसीआर प्रविधिबाट कोरोना परीक्षण गर्दा थाहा नगरपालिकाका दुई जनामा कोरोना संक्रमण पुष्टि भएको हो । 

थाहापाटी श्रोतका अनुसार शुक्रबार कोरोना संक्रमण पुष्टि भएका एक जना थाहा नगरपालिका–२ का हुन् भने अर्का व्यक्ति थाहा नगरपालिका–६का हुन् । उनीहरु दुबैजना दुबइबाट आएका थिए । विदेशबाट फर्किएपछि उनीहरु बज्रवाराहीस्थित नगरको क्वारेन्टाइनमा बसेका थिए ।  उनीहरुको स्वाब गत साउन ३२ गते हेटौंडा पठाइएको थियो ।

गत भदौ ३ गते उनीहरु दुबैको रिपोर्ट नेगेटिभ आएको भनी बागमती प्रदेश सरकारअन्तर्गत जनस्वास्थ्य प्रयोगशालाले प्रमाणित गरी पठाएपछि उनीहरुलाई क्वारेन्टाइनबाट विदा गरी घर पठाइएको थियो । उनीहरु घरमै बसिरहेको अवस्थामा शुक्रबार उनीहरुको रिपोर्ट पोजिटिभ आएको छ । प्रयोगशाला प्रशासनले शुक्रबार सार्वजनिक गरिएको रिपोर्टअनुसार थाहा नगरपालिकाका दुई जनामा कोरोना संक्रमण पुष्टि भएको जनाएपछि अहिले थाहा नगरमा खैलाबैला मच्चिएको छ । 

घरमै बसिरहेको अवस्थामा कोरोना संक्रमण पुष्टि भएपछि उनीहरुलाई थाहानगर कोरोना रोकथाम तथा नियन्त्रण सचिवालयले सम्पर्कमा ल्याएर हेटौंडाको गौरीटारस्थित आइसोलेसन वार्डमा पठाउने तयारी थालिएको छ । 

थाहा–२ को संक्रमितको सम्पर्कमा आएका दुईजना अटोचालकसहित ८ जनालाई बज्रवाराहीस्थित क्वारेन्टाइनमा पठाइएको कोरोना रोकथाम सचिवालयका उपसंयोजक मेघराज बलामीले बताउनु भयो । थाहा–२ का संक्रमित व्यक्ति क्वारेन्टाइनबाट छुटेपछि बज्रवाराहीसम्म एउटा अटोमा र बज्रवाराहीबाट घरसम्म जान अर्को अटोमा चढेका थिए । 

थाहा–६ का कोरोना संक्रमतिको सम्पर्कमा आएका परिवारका सदस्यहरुलाई भने होम क्वारेन्टाइनमा राखिएको छ । 

यो समाचार तयार पार्दासम्म पालुङ प्राथमिक स्वास्थ्य केन्द्रका डाक्टर सुवोध चापागाईं, क्वारेन्टाइन डाक्टर उदय रोकासहितको टोलीले संक्रमितहरुको कन्ट्याक्ट ट्रेसिङको काम गरिरहेको छ ।