डलकुसनको बजार देखेपछि हौसिएका थाहा ३ का महिलाले स्तरोन्नति तालिम लिए।

थाहा नगरपालिका-३ का ७ जना महिलाहरुले यत्तिको आकर्षक डल बनाएकाेप्रति साेही वडाका वडा सदस्य  कृष्णकुमार कार्कीले  महिलाहरुकाे खुलेर प्रशंसा गरे । उनले अघि भने- 'सिक्दै बनाएकाे डल र कुशन त यति राम्राे, व्यवसायिक ढंगले बनाउँदा त अझ कति राम्रो हाेला' ।

गत बर्ष १७ फागुनमा  थाहा-३ का २२ जना महिलाहरु सहभागी भएर डल-कुशन तालिम लिएका  थिए । महिलाहरुले व्यवसायिकरुपमा डल-कुशन निर्माण पनि गरे,बजारकाे लागि चौथो थाहा महोत्सवमा बनाएका डलहरुको राम्रो बिक्री पनि भयो।

अघिल्लो बर्ष बुटवलबाट आएकी सरिता थापाले थाहा-३ का २२ जना महिलाहरुलाई १५ दिनसम्म डल-कुशन बनाउने तालिम दिएकी थिइन् । अहिले सोही कार्यक्रम अन्तर्गत थाहा नगरपालिकाले गरिबी निवारणका लागि लघु उद्यम विकास कार्यक्रमअन्तर्गत प्रशिक्षक दिपेन्द्र न्यौपानेले १० दिन सम्म बिकास घर शिखरकोटमा  स्तरोन्नति तालिम दिएकाे हाे । तालिममा सहभागी ७ जना महिलाहरुले ठुला डल र कुशन बनाउन सिकेका हुन।

१० दिन चलेको तालिम समापनमा महिलाहरुले बनाएकाे डल-कुशनकाे नमुना पनि राखिएकाे थियाे । उद्यम विकास सहजकर्ता सुनिता बुढा क्षेत्री र मेड्पाका फोकल पर्सन अस्मिता तिवारी घिमिरे र प्रशिक्षक दिपेन्द्र न्यौपाने,सामीका मनोपरामर्शदाता सुनिता बस्नेत लगायतले तालिममा सहभागी महिलाहरु व्यक्तिगत तथा सामुहिकरुपमा व्यवसायी बन्नेमा विश्वास व्यक्त गरे ।
तालिममा सहभागी यारसाङ बलले  यो सीपलाई व्यवसायिक बनाउने बताइन् । उनले बजार खोजेर व्यापार  नै गर्ने लक्ष सुनाइन् । ‘अरु दिदी बहिनीले पनि काम गर्नु भयो भने मैले समेत गरेर बजारमा बेच्ने योजना बनाएकी छु’ उनले भनिन्, ‘थाहाका बजारमा पनि ती सामानको राम्रो बिक्री हुने गरेको छ ।’ बाहिरबाट आएका सामान बेच्नेलाई स्थानीय उत्पादन दिन सके धेरैको रोजगारी बढ्ने बताइन् ।

थाहाका महिला हरुलाई उद्यमी बनाउने लक्ष राखिएको थाहा नगर प्रमुख बिष्णु बिष्ट बताउछन्  । उनले हरेक महिला उद्यमी बनेर कमाउन सक्ने भएमा हिंसा समेत अन्त्य हुने बताउनुभयो। ‘सचेतनाका कार्यक्रममा मात्र गरिएको लगानी भन्दा हरेक महिलालाई उत्पादनमा जोड्दा हिंसा कम हुन्छ भन्ने लक्षले यस्ता गतिविधि गरेका छौं’ उनले भने,।