जुरिस्डिक्सनल रेडप्लस उत्सर्जन न्यूनीकरण सम्बन्धी पालिका स्तरीय सचेतना तथा अन्तरक्रिया कार्यक्रम सम्पन्न

थाहा नगर । जलवायु परिवर्तन न्यूनीकरण तथा बन संरक्षण सम्बन्धी जुरिस्डिक्सनल रेडप्लस उत्सर्जन न्यूनीकरण कार्यक्रम अन्तर्गत एक दिने पालिका स्तरीय सचेतना तथा अन्तरक्रिया कार्यक्रम सम्पन्न भएको छ ।
कार्यक्रममा सहजकर्ता सीता स्याङ्तान तामाङले रेडप्लस कार्यक्रमको महत्व, उद्देश्य र स्थानीय तहमा यसको कार्यान्वयनका पक्षहरूबारे विस्तृत जानकारी दिनुभयो । सो कार्यक्रममा नेपाल आदिवासी जनजाति महासंघ नेपालका प्रतिनिधि तथा केन्द्रीय कोषाध्यक्ष बिमल सारु मगरको विशेष सहजीकरण गरेका थिए ।
कार्यक्रमको मुख्य उद्देश्य आदिवासी जनजाति, स्थानीय समुदाय र सरोकारवाला निकायहरूलाई रेडप्लस कार्यक्रमबारे जानकारी गराउने रहेको थियो । कार्यक्रममा सहभागीहरूले वन विनाश र वन क्षयिकरणका कारणहरू, वनको दिगो व्यवस्थापनमा रहेका बाधा अवरोध, जलवायु परिवर्तनका कारण र त्यसको न्यूनीकरणमा वनको भूमिकाबारे विस्तृत छलफल गरेका थिए ।
साथै, रेडप्लस अवधारणा, नेपालमा रेडप्लससँग सम्बन्धित संरचना र आदिवासी जनजाति तथा स्थानीय समुदायको सशक्त सहभागिता सुनिश्चित गर्नुपर्ने विषयमा विशेष जोड दिइएको थियो ।
कार्यक्रममा कबारी कोषले कार्बन उत्सर्जन नियन्त्रणका विषयमा सञ्चालन गर्दै आएको कार्य योजना र बागमती प्रदेशका ३२ वटा पालिकामा रेडप्लस कार्यक्रम लागू भइसकेको जानकारी गराइएको थियो ।
यस कार्यक्रममा सहभागी सरोकारवाला निकाय र समुदायका प्रतिनिधिहरूले वन संरक्षण, जलवायु परिवर्तन न्यूनीकरण तथा स्थानीय समुदायको भूमिकाबारे आफ्नो धारणा र सुझावहरू प्रस्तुत गरेका थिए ।
रेडप्लस (REDD+) कार्यक्रमले वन विनाश र क्षयिकरण न्यूनीकरण, वनको दिगो व्यवस्थापन र कार्बन उत्सर्जन घटाउँदै जलवायु सन्तुलन कायम गर्न सहयोग पुर्‍याउने उद्देश्य राख्दछ ।