जिससद्वारा थाहाको नदीजन्य स्टक प्रमाणित  

जिल्ला अनुगमन तथा समन्वय समितिले थाहा नगरपालिकाको नदिजन्य पदार्थ (ढुंगा, गीट्टी, बालुवा) को स्टक प्रमाणित गरेको छ । अनुगमन समितिका संयोजक रघुनाथ खुलालको अध्यक्षतामा बसेको बैठकले थाहा नगरपालिकको नदिजन्य पदार्थको स्टक प्रमाणित गरेको हो ।

ढुंगा, गिट्टी, बालुवाको प्रमाणिकरणका लागि डिभिजन वन कार्यालयका प्रमुखको नेतृत्वमा गठित उपसमितिले पेश गरेको स्टक प्रमाणित प्रतिवेदनलाइ बैठकले स्वीकृत गरेको समितिका संयोजक रघुनाथ खुलालले जानकारी दिनुभयो । उपसमितिले पालिकाहरूमा स्थलगत रुपमा (नदिजन्य पदार्थ) ढुंगा, गिट्टी, बालुवाको नापजाँच गरेर तयार पारेको स्टक प्रतिवेदनलाई समितिले स्वीकृत गर्ने निर्णय गरेको उहाँले बताउनुभयो । 
त्यस्तै बसेको बैठकले स्टक प्रमाणित भएका पालिकाहरुमा फरक मौजदात देखिएको जफतयोग्य ढुंगा, गिट्टी, बालुवालगायत नजिदन्य पदार्थहरु तत्काल राजस्व सङ्कलन गरी अनुगमन समितिलाई जानकारी गर्न निर्देशन दिने निर्णय समेत गरेको उहाँले बताउनुभयो । 

बैठकमा थाहा नगरपालिकाका उपमेयर खड्ग गोपाली सहभागी हुनुहुन्थ्यो । त्यस्तै ईन्द्रसरोवर गाउँपालिकाका अध्यक्ष जीवन लामा, मनहरी गाउँपालिकाका अध्यक्ष एकराज उप्रेती, राक्सिराङ गाउँपालिकाकी उपाध्यक्ष निर्मला हिमडुङ्, प्रमुख जिल्ला अधिकारी गोविन्द प्रसाद रिजाल, डिभिजन वन कार्यालय मकवानपुरका प्रमुख ईमनाथ पौडेल, डिभिजन वन कार्यालय राप्तीका प्रमुख दिर्घनारायण कोईराला, जिल्ला समन्वय अधिकारी आनन्दराज पोखरेल, आन्तरिक राजस्व कार्यालय हेटौंडाका प्रमुख सन्त बहादुर ढकाल, सशस्त्र प्रहरी उपरीक्षक नीरकृष्ण अधिकारीलगायत अनुगमन समितिका सदस्यहरुको उपस्थिती थियो ।