जनकल्याण माविलाई नमुना विद्यालयको रुपमा विकास गर्न ५ वर्षीय गुरुयोजना

 थाहा नगरपालिकामा रहेको जनकल्याण माविलाई नमुना विद्यालयको रुपमा विकास गर्न ५ वर्षीय गुरुयोजना बनाइने भएको छ । नमुना विद्यालयअन्तर्गत शैक्षिक, व्यवस्थापकीय र भौतिक पूर्वाधार विकासका लागि ५ वर्षीय गुरुयोजना बनाइन लागेको जनकल्याण माविका प्रधानाध्यापक सानोभाइ कार्कीले जानकारी दिनुभयो । शिक्षा, विज्ञान तथा प्रविधि मन्त्रालयले नमुना विकासका लागि छनोट गरेका देशभरका एक सय विद्यालयमध्ये मकवानपुरको जनकल्याण मावि पनि समावेश भएपछि विद्यालयले नमुना बनाउन प्रक्रिया शुरु गरेका उहाँले जानकारी दिनुभयो ।

नमुना विद्यालय विकासको लागि विद्यालयले जिल्ला समन्वय समिति मकवानपुरका प्रमुख रघुनाथ खुलाल, थाहा नगरपालिकाका प्रमुख लवशेर विष्ट, वडा अध्यक्षहरु, नमुना विद्यालय राट्रिय संजालका अध्यक्ष पूर्णप्रसाद दवाडी, शिक्षा विकास निर्देशनालय वागमती प्रदेशका निर्देशक चन्द्रप्रसाद लुईंटेल, जिल्ला आयोजना कायान्वयन इकाई(शिक्षा)का प्रमुख बद्रिबहादुर पाठक लगायतको सहभागितामा अन्तरक्रिया कार्यक्रम कार्यक्रमसमेत गरेको छ । कार्यक्रममा नमुना विद्यालय विकासका लागि पहलबारे नमुना विद्यालय राट्रिय संजालका अध्यक्ष पूर्णप्रसाद दवाडीले धारणा राख्नुभएको थियो भने प्रभावकारी शिक्षणबारे बद्रिबहादुर पाठक र शैक्षिक प्रशासनका बारेमा चन्द्रप्रसाद लुईंटेलले बोल्नुभएको थियो ।

कार्यक्रममा आफ्नो धारणा राख्दै नमुना विद्यालय राट्रिय संजालका अध्यक्ष दवाडीले योजना निर्माण र प्रतिवद्ध कार्यान्वयन भए सफलता प्राप्त गर्न सकिने बताउनु भयो । थाहा नगरपालिकाका प्रमुख लवशेर विष्टले नमुना विद्यालय विकासका लागि चुनौति भए पनि यो नगरपालिकाको लागि विशेष अवसर समेत भएको बताउनु भयो । अन्तरक्रिया कार्यक्रमको जिल्ला समन्वय समिति मकवानपुरका प्रमुख रघुनाथ खुलालले डिजिटल प्रविधिबाट उद्घाटन गर्नुभएको थियो ।