चौथों थाहा महोत्सवको तयारी तिव्र

थाहा नगरपालिकाको ईन्द्रायणी चौरमा संचालन हुन् लागेको चौथो थाहा महाेत्सवको तयारी तिव्र पारिएको छ । महोत्सवमा राखिने स्टल र मनोरञ्जनात्मक सामाग्री निर्माणको काम अहिले धमाधम भैरहेको आयोजकले जनाएको छ ।

महोत्सवको विषयमा ५ मंसिरमा पालुङ बहुउद्देश्यीय सहकारी संस्था लिमिटेडमा भएको मूल आयोजक समितिको छलफल कार्यक्रममा यस्तो बताइएको हो ।

थाहा नगर उद्योग वाणिज्य संघको मुख्य आयोजना तथा थाहा नगरपालिकाको आयोजना र ईन्द्रायणी काला भैरव गुठिको सह आयोजनामा  यही मंसिर १४  गतेदेखी २६ गतेसम्म १० दिन बृहत थाहा  कृषि,  पर्यटन तथा व्यापार साँस्कृतिक महोत्सव सञ्चालन गर्न लागिएको हो ।
महोत्सवमा कृषि उपज,घरेलु हस्तकला,स्थानीय उत्पादन,कुलेखानीको माछा,नेवारी परिकार बिक्री तथा प्रदर्शनी ,सूचना प्रविधि सम्बन्धि जानकारी ,दैनिक उपभोग्य सामाग्रीको बिक्री लगायतका सामाग्री राखिने महोत्सव आयोजक मुल समिती संयोजक पुरुषोत्तम ढकालले बताए ।

महोत्सवमा रोटे पिङ, मवतका कुवा, बाल उद्दानका सामाग्री, आकर्षण टिकटक स्टेज, ड्राइगन रेल लगायत राखिने मुल आयोजक समितिका थाहा नगर उद्योग वाणिज्य संघका महासचिव जर्म श्रेष्ठले   बताए । उनका अनुसार अहिले यी कामहरु भैरहेका छन् ।

त्यस्तै स्टलहरुका काम पनि धमाधम भैरहेको उनले बताए । अहिले धेरैजसो स्टलहरु बुकिङ भैरहेको र बुकिङ गर्न इच्छुकले छिटो सम्पर्क गर्न उनले आग्रह गरेका छन् ।

कार्यक्रममा थाहा नगरपालिकाका नगर प्रमुख विष्णु बहादुर विष्ट, इन्द्रसरोवर गाउँपालिका अध्यक्ष देवकृष्ण पुडासैनी, थाहानगर उद्योग वाणिज्य संघका पदाअधिकारीहरुलगायत मूल आयोजक समितिका पदाअधिकारीहरुको सहभागिता रहेको थियो ।

महाेत्सवमा चर्चित राष्ट्रिय कलाकार र स्थानीय कलाकारहरुकाे सहभागीता रहने आयोजकले जनाएको छ ।