चित्लाङमा २५ शैयाको अस्पताल बन्ने,पाँच सय किलोवाटको सौर्य ऊर्जा र ६ सय किलोवाटको पम्प स्टोरेज प्लान्ट पनि स्थापना गरिदै

थाहानगरको  चित्लाङमा २५ शैय्याको अस्पताल निर्माण हुने भएको छ । चित्लाङ स्थित निर्माणाधिन मदन भण्डारी विज्ञान तथा प्रविधि विश्वविद्यालय परिसरमा अस्पताल निर्माणको प्रस्ताव परेपछि अस्पताल बन्ने भएको हो । विश्वविद्यालयको वातावरणीय प्रभाव मूल्याङ्कन अध्ययन प्रतिवेदनलाई अन्तिम रूप दिने तयारी समेत भएको छ । प्रस्ताव पारित भए पश्चात् अस्पताल निर्माणको समेत बाटो खुल्नेछ । 
विश्व विद्यालयको प्रस्तावित आयोजनामा अस्पताल सहित शैक्षिक भवन, कम्युनल भवन, ६ सय ७ कर्मचारीका लागि आवास, ४० कोठाको अतिथि भवन, विद्यालय र सडक निर्माण हुने छ । प्रतिवेदन अनुसार आयोजना क्षेत्रमा, खानेपानी आपूर्ति तथा ढल निकास, बिजुली आपूर्ति, विद्युत् र सञ्चार सञ्जाल रहने छन् । 
आयोजना निर्माणपछि स्थानीयस्तरमा अधिक रूपमा सकारात्मक प्रभाव पर्ने देखिएको छ । प्रस्तावित आयोजना पूरा भएपछि दक्षता, सिप र क्षमता अनुसार रोजगारी सिर्जना, पहुँच सडक, विद्यमान सडकको स्तरोन्नति÷सुधार हुने विश्वास गरिएको छ । यस्तै स्थानीय आर्थिक गतिविधिमा वृद्धि र स्थानीय सरकारलाई राजस्व संकलनको अवसर पनि मिल्ने देखिएको छ । 
चित्लाङमा आयोजनाले विश्वविद्यालयमा आवश्यक पर्ने पानीका लागि आकासे पानी संकलन र जमिनमुनिको पानीमा निर्भर हुने, विश्वविद्यालयबाट निस्कने मलमूत्रबाट बायोग्यास निकाल्ने, फोहोर पानी प्रशोधन गर्ने तथा पाँच सय किलोवाटको सौर्य ऊर्जा र छ सय किलोवाटको पम्प स्टोरेज प्लान्ट स्थापना गरिने भएको छ । प्रस्तावित आयोजनालाई आवश्यक ५० दशमलब ५२ हेक्टर जमिनमा हाल घाँसे मैदान, नास्पाती खेती तथा वन रहेकोमा आयोजनाको निर्माणसँगसँगै उक्त जमिन भवनमा परिणत हुने छ । इ आइ ए प्रतिवेदनका लागि आएका सुझावहरूसहित प्रतिवेदनलाई थपघट गरी अन्तिम रूप दिने विश्वविद्यालयका कन्सल्टेन्ट सञ्जयनाथ खनालले बताउनु भयो । थाहा नगरपालिका वडा नम्बर ९ को चित्लाङमा विश्वविद्यालयको भौतिक संरचना निर्माणाधीन छ । यस आयोजनाको निर्माण लागत ४९ अर्ब रुपियाँभन्दा बढी रहेको छ ।