गाउँपालिकालाई २७ थान अक्सिजन सिलिन्डर हस्तान्तरण

स्थानीय क्रसर व्यवसायीहरुले आफूहरुसँग रहेको २७ थान अक्सिजन सिलिण्डर सङ्कलन गरेर स्थानीय सरकारलाई बुझाएका छन् । मकवानपुरको मनहरी क्षेत्रमा काम गरिरहेका क्रसर व्यवसायीहरुले मनहरी गाउँपालिकालाई अक्सिजन सिलिण्डर हस्तान्तरण गरेका हुन् ।
मनहरी गाउँपालिकाभित्र  संचालनमा रहेका ९ वटा क्रसर तथा बालुवा प्रशोधन उद्योगले स्थानीय  कोरोना अस्पतालका लागि  अक्सिजनका खाली सिलिन्डर उपलब्ध गराएको क्रसर व्यवसायी राजकुमार रावलले बताउनुभयो । उहाँका अनुसार क्रसर उद्योगमा अहिले अक्सिजनको काम नभएकाले अस्पताललाई हस्तान्तरण गरिएको हो । ‘अहिले उद्योगमा अक्सिजन सिलिन्डरको काम छैन, कामै हुँदा पनि मानिसको ज्यानभन्दा ठूलो काम होइन’, रावलले भन्नुभयो ।
मनहरी गाउँपालिकास्थित दाङसिङ सेन्ड इन्डस्ट्रिजबाट ४ थान, चतुर्मुखुी क्रसर तथा बालुवा प्रशोधन उद्योग प्रालिबाट ३ थान, सन्तोेषी बालुवा उद्योगबाट ४ थान, जनसेवा क्रसर उद्योगबाट २ थान, दुर्गालक्ष्मी एग्रिगेट्सबाट १ थान, ओम शान्त बालुवा उद्योगबाट १ थान, आफ्नै बालुवा उद्योगबाट १ थान, स्वस्तिक क्रसर उद्योगबाट १ थान र बर्ताैला बालुवा उद्योग तथा इन्जिनियरिङ वक्र्सबाट १० थान सिलिन्डिर कोभिड अस्पताललाई हस्तान्तरण गरिएको क्रसर व्यवसायी रावलले जानकारी दिनुभयो ।
उद्योगीहरुले उपलब्ध गराएको अक्सिजन सिलिन्डर मनहरी गाउँपालिकाका अध्यक्ष एकराज उप्रेतीले बुझ्नुभएको थियो । अक्सिजनको खाली सिलिण्डर प्राप्त भएपछि गाउँपालिका अध्यक्ष उप्रेतीले कोरोनाका बिरामीका लागि अक्सिजन व्यवस्थापनमा सहज हुने बताउनुभयो ।