गाईभैंसीमा कृत्रिम गर्भाधानले व्यवसायिक बन्दै कृषकहरु

कृत्रिम गर्भाधानको सुविधा भएपछि मकवानपुरको थाहा नगरपालिकाका कृषकहरु दूधलक्षित पशुपालनतर्फ आकर्षित भएका छन् । कृत्रिम गर्भाधानबाट जन्मेका बाच्छी र पाडीबाट हुर्केका गाईभैंसीमा दूध उत्पादन क्षमता बढी हुने भएकोले कृषकहरु व्यवसायिक पशुपालनतर्फ आकर्षित हुँदै गएको थाहा नगरपालिका पशु सेवा शाखाका प्रमुख राघबेन्द्र मिश्रले बताउनुभयो ।

थाहा नगरपालिकाको पशु सेवा शाखाले आर्थिक वर्ष २०७६/०७७ मा नगर क्षेत्रभित्रका ५३० गाईभैंसीमा कृत्रिम गर्भाधान गरेको छ । चालु आर्थिक वर्षमा पनि यस्तो कार्यक्रम रहेको शाखा प्रमुख मिश्रले बताउनु भयो ।

गत आर्थिक वर्षमा थाहा नगरका कृषकहरुले दूध विक्रीबाट एक करोड ४६ लाख ५३ हजार ६०० रुपियाँको दूध विक्री गरेका छन् । थाहा–३ घर्तिखोलाका युवराज बर्तौलाले १० महिनाको अवधिमा ६ हजार ५४० लिटर दूध विक्री गरेर तीन लाख २७ हजार रुपिया आर्जन गर्नु भएको छ ।

बर्तौलाले मात्र होइन, थाहा–६ की यसोदा अधिकारीले पनि दूध विक्रीबाट राम्रै आम्दानी गर्नुभएको छ । दुईवटा उन्नत गाई पाल्दै आउनुभएकी अधिकारीले वर्षमा दुई लाख १८ हजार बराबरको दूध बेच्नु भएको छ । यसैगरी थाहा–६ कै ओमकुमार सुवेदीले तीन हजार ८७० लिटर दूधबाट एक लाख ९३ हजार ५०० रुपियाँ कमाउनु भयो ।

कृषकहरु व्यवसायिक पशुपालन तर्फ आकर्षित हुन थालेपछि थाहा नगरपालिकाले उनीहरुलाई अनुदान दिनुका साथै बैंक तथा वित्तीय संस्थाहरुबाट सहुलियतमा कर्जा उपलब्ध गराउन समन्वयसमेत गर्ने नीति लिएको छ ।

चालु आर्थिक वर्षमा थाहा–१२ जगडाँडामा ३० वटा भैंसीपालनको लागि २५ प्रतिशत अनुदानको व्यवस्था गर्नुका साथै पकेट क्षेत्रका कृषकका लागि २० वटा गाइका लागि २५ प्रतिशत अनुदान दिने कार्यक्रम रहेको पशु सेवा शाखाले जनाएको छ ।

थाहा नगरमा ३०६ जना कृषकले व्यवसायिक पशुपालन गरेर दूध विक्री गर्दै आएका छन् ।