गठबन्धनको थाहा नगर स्तरीय निर्वाचन परिचालन कार्यालय स्थापना

 थाहा नगर, ८ कात्तिक/ बाम लोकतान्त्रिक गठबन्धनको थाहा नगर स्तरीय निर्वाचन परिचालन कार्यालय स्थापना गरिएको छ । गठबन्धनको संयुक्त निर्वाचन परिचालन, प्रचारप्रसारका लागि नेकपा माओबादी केन्द्रको थाहा नगर पार्टी कार्यालय शिखरकोटमा कार्यालय स्थापना गरिएको हो । कार्यालय स्थापना गर्दै नेताहरुले यहि मंसिर ४ गते हुने प्रतिनिधिसभा तथा प्रदेश सभा निर्वाचनमा बाम लोकतान्त्रिक गठबन्धनका उम्मेद्वारलाई बिजयी गराउन इमान्दार भई मतदान गर्न गठबन्धन दलका थाहा नगरका नेताहरुले कार्यकर्ताहरुलाई अनुरोध गरेका छन् । गठबन्धन अन्तरगत नेपाली कांग्रेस थाहा नगर सभापति प्रमोद कृष्ण जोशीले लोकतन्त्रको रक्षा र यस क्षेत्रको बिकासको लागि थाहा नगरका कांग्रेस समर्थकले गठबन्धनका उम्मेद्वारलाई मतदान गर्ने बताउनुभयो । उहाँले पाँच दलको गठबन्धनमा नेपाली कांग्रेस पनि सहभागी भएकोले यस क्षेत्रका उम्मेद्वारहरुलाई मतदान गरि बिजयी गराउने बताउनुभयो । त्यस्तै नेकपा माओबादी केन्द्रका थाहा नगर अध्यक्ष बिनोद कुमार लामाले गठबन्धन अन्तरगतका उम्मेद्वारलाई मतदान गरी बिजयी गराउन मतदाताहरुलाई अनुरोध गर्नुभयो । लोकतान्त्रिक संबिधान अनुसार देशलाई अगाडि बढाउन गठबन्धनका उम्मेद्वारहरु बिजयी हुनुपर्ने बताउनुभयो ।

नेकपा एकीकृत समाजबादीका थाहा नगर अध्यक्ष सानोकाजी गोपालीले प्रतिगमनबाट देशलाई बचाउन गठबन्धन बनेकोले गठबन्धनका उम्मेद्वारहरुलाई बिजयी गराउन अनुरोध गर्नुभयो । राष्ट्रिय जनमोर्चाका मकवानपुर जिल्ला सचिब तथा थाहा नगर अध्यक्ष दिनेश बिष्टले गठबन्धनको मर्म अनुरुप आफ्नो दलको नेता तथा कार्यकर्ताले गठबन्धनका उम्मेद्वारहरुलाई मतदान गर्ने बताउनुभयो । बाम लोकतान्त्रिक गठबन्धन अन्तरगत मकवानपुर क्षेत्र नं. २ मा नेकपा (एकीकृत समाजवादी)का स्थायी समिति सदस्य बिरोध खतिवडा, प्रदेशसभा क मा नेकपा (माओबादी केन्द्र)की पोलिटब्युरो सदस्य, मकवानपुर ईञ्चार्ज कुमारी मोक्तान र प्रदेश सभा ख मा नेपाली कांग्रेस बागमति प्रदेश सभापति इन्द्रबहादुर बानियाँले उम्मेद्बारी दिनुभएको छ ।