कैलाशको बिमिरेखोलामा फेला परेको शबको पहिचान खुल्यो 

कैलाश गाउँपालिका–५ बिमिरे खोलामा एक पुरुषको शब भेटिएको छ । कैलाश–५ कै ३८ वर्षीय सोम सिन्तानको शब भेटिएको प्रहरी चौकी डाँडाखर्कका प्रहरी सहायक निरीक्षक तेजनारायण कुँवरले जानकारी दिनुभयो । 

कैलाश गाउँपालिका वडा नं. १ र ५ को दोभानमा पर्ने बिमिरे खोलामा आज विहान एक पुरुषको शब देखेपछि स्थानीयहरुले वडा अध्यक्षलाई खबर गरेका थिए । सबको पहिचान भएको र मृतक सिन्तान तीन दिनदेखि हराइरहेको कैलाश–५ का वडाअध्यक्ष छेकु लामाले बताउनु भयो ।

सिन्तान गत बिहीबार घरबाट खोला पारी काम गर्न गएको र त्यसपछि नफर्किएको आफन्तहरुले बताएका छन् । सिन्तान काम गर्न निस्केदेखि अविरलरुपमा वर्षा भएको थियो । भोलिपल्ट अवेरसम्म घरमा नआएपछि आफन्तले सिन्तानको खोजी शुरु गरेका थिए । 

गाउँमा धावा भनेर चिनिने सिन्तानको शब बिमिरे खोलामा भेटिए पनि त्यसभन्दा ४ किलोमिटर माथि पर्ने पाँचखोलाले बगाएर त्यहाँसम्म पु¥याएको अनुमान गरिएको वडा अध्यक्ष लामाले बताउनु भयो ।  खोलामा शब भेटिएपछि सो स्थानमा कैलाशस्थित डाँडाखर्क प्रहरी चौकीका प्रसनी कुँवरको नेतृत्वमा प्रहरी टोली पुगेको थियो । 

अहिले शब भेटिएको स्थलमा सिन्तानका आफन्तहरु पनि पुगिसकेका छन् । इलाका प्रहरी कार्यालय पालुङका प्रहरी निरीक्षक विकासकुमार तामाङ नेतृत्वको टोली पनि त्यसतर्फ गएको छ । अहिले आफन्तहरुको रोहबरमा शब उठाएर पोष्टमार्टमका लागि पठाउने तयारी भइरहेको डाँडाखर्क प्रहरी चौकीका प्रमुख कुँवरले बताउनु भयो ।